دہلی میں ہوئے تنازع کے وائرل ویڈیو میں اجے دیوگن نہیں

سوشل میڈیا پر دہلی میں ہوئے جھگڑے کی ایک ویڈیو بہت تیزی سے وائرل ہو رہی ہے۔ اس میں اداکار اجے دیوگن کی پٹائی کی جا رہی ہے۔ پولیس کی جانب سے اس کو پارکنگ کے تنازع سے متعلق معاملہ قرار دیا گیا ہے لیکن اس دوران اجے دیوگن کے دفتر نے ایک بیان جاری کر کے یہ واضح کر دیا ہے کہ دہلی میں جھگڑے کی وائرل ویڈیو میں اجے دیوگن نہیں ہے۔

اداکار اجے دیوگن کے دفتر نے ایک بیان جاری کر کے واضح کیا ہے کہ دہلی میں ہوئے ایک تنازع کی ویڈیو میں وہ نہیں ہیں۔ ویڈیو میں دو افراد ایک پب کے باہر لڑتے ہوئے دکھائی دے رہے ہیں جو گالی گلوچ کر رہے ہیں۔ مردوں میں سے ایک سفید رنگ کی شرٹ پہنے ہوئے شخص کو اجے دیوگن سمجھ لیا گیا۔

بیان میں کہا گیا ہے کہ اجے دیوگن جنوری 2020 میں 'تاناجی - دی انسنگ یودھا' کی تشہیر کے بعد سے دہلی نہیں گئے ہیں لہذا دہلی میں ایک پب کے باہر جھگڑے میں سپر اسٹار کے ملوث ہونے کی میڈیا رپورٹ بالکل بے بنیاد اور جھوٹی ہے۔ ہم نیوز ایجنسیوں سے درخواست کرتے ہیں اور میڈیا کو اس بات پر دھیان دینا چاہئے کہ گزشتہ 14 مہینوں سے اجے دیوگن ممبئی میں ہیں اور 'میدان'، 'میڈے' اور 'گنگوبائی کاٹھیا واڑی' کی شوٹنگ میں مصروف ہیں۔ میڈیا سے گزارش ہے کہ حقائق کی چھان بین کر لیں۔