سشانت کی یاد میں بھومی نے نظم لکھی

بالی ووڈ اداکارہ بھومی پیڈنیکر نے سشانت سنگھ راجپوت کو یاد کرتے ہوئے ایک جذباتی نظم لکھی ہے۔

سشانت سنگھ راجپوت کے جانے کے بعد بالی ووڈ اور ٹی وی کے ان کے ساتھی اداکار انہیں یاد کر رہے ہیں۔ بھومی پیڈنیکر نے سشانت کے لئے ایک نظم لکھی ہے۔ اس نظم کے ذریعہ بھومی نے بتایا ہے کہ سشانت کو کتابوں، خلا اور موسیقی سے کتنا پیار تھا نیز وہ اس پیار کو دوسروں کے ساتھ تقسیم بھی کرتے تھے۔

بھومی پیڈنیکر نے بتایا کہ فلم کے سیٹ پر سشانت ان کے استاد بن گئے تھے، جن کا انتظار قلم اور کاغذ کے ساتھ کیا کرتی تھیں۔ انہوں نے بتایا کہ کس طرح سشانت نے خوشی خوشی بھومی اور باقی لوگوں کو اپنے ٹیلی اسکوپ سے مختلف سیارے اور بلیک ہول دکھائے جسے دیکھ کر وہ حیران رہ گئی تھیں۔

بھومی نے لکھا ’’ہم نے کئی مصنفین کے بارے میں بات کی ہے۔ اس کے ساتھ نظریہ ، کامیابی اور زندگی پر تبادلہ خیال کیا ہے۔ ہم نے بحث کی ہے۔ ہماری لڑائی ہوئی ہے۔ ہم نے چارٹس اور الگوردھم کی مدد سے موسیقی کو سمجھنے کی کوشش بھی کی ہے۔ تم نے آرٹ کی مدد سے نیوٹن کی تھیوری سمجھانے کی کوشش کی تھی ۔ تم نے مجھے زندگی بھر کا تجربہ دے دیا میرے دوست۔ تمہارے جانے کا غم تم سے مل چکے اور جو ابھی تک نہیں ملے سب کو ہے تم یاد آؤگے ہمارے ایس ایس آر‘‘۔