بالی ووڈ کے مشہور اسٹار امیتابھ بچن نے پیر کے روز اپنے مداحوں کا نیک خواہشات پیش کرنے پر شکریہ ادا کیا ہے۔ اداکار نے ایک دن قبل ہی اپنے نجی بلاگ میں اپنے سرجری کے بارے میں خبر شیئر کی تھی۔
انہوں نے لکھا تھا کہ اپنی طبی حالت کی وجہ سے انہیں ایک سرجری کروانے کی ضرورت ہے جس کے بعد ان کے مداحوں نے ان کی صحتمندی کے لیے دعائیں بھیجی تھیں۔
اداکار نے مداحوں کے ذریعہ ملنے والے پیار پر شکریہ ادا کیا ہے۔ 78 سالہ اداکار نے اپنے بلاگ پر لکھا ہے کہ ''نیک خواہشات دینے اور میری صحت کے تئیں فکرمندی ظاہر کرنے کے لیے آپ سب کو پیار اور شکریہ''
انہوں نے ٹویٹر پر نمستے ایموجی کا استعمال کرتے ہوئے اپنے مداحوں کا شکریہ ادا کیا۔
ہندی فلم انڈسٹری کے مصروف ترین ستاروں میں سے ایک امیتابھ بچن حال ہی میں اجے دیوگن کی ہدایتکاری میں بننے والی فلم "مئے ڈے" کی شوٹنگ کر رہے تھے۔
