برطانیہ کے دارالحکومت لندن میں لاک ڈاؤن کے خلاف احتجاج منظم کیا گیا۔ جسمانی فاصلے کے قواعد کی خلاف ورزی بھی کی گئی۔ پولیس نے اس دوران 19 مظاہرین کو گرفتار کیا ہے۔
پولیس کے مطابق لوگ لاک ڈاؤن کے قواعد کے خلاف ہائیڈ پارک میں مظاہرہ کر رہے تھے اور اس دوران لوگوں کا ایک گروپ بہت قریب آیا، جس نے جسمانی فاصلے کے قوانین کی خلاف ورزی کی جس سے انفیکشن کا خطرہ بڑھ سکتا ہے۔
لندن کے ڈپٹی کمشنر آف پولیس لارنس ٹیلر نے کہا کہ 'پولیس اہلکاروں نے ہائیڈ پارک میں مظاہرین کو منتشر کرنے کی کوشش کی لیکن لوگ نہیں مانے اور اس دوران 19 افراد کو گرفتار کرلیا گیا ہے۔ اس کے علاوہ 10 افراد پر جرمانہ بھی عائد کیا گیا ہے'۔
اہم بات یہ ہے کہ 13 مئی سے برطانیہ میں لوگوں کو لاک ڈاؤن کے کچھ قواعد میں نرمی کرتے ہوئے پارکوں کا دورہ کرنے کی اجازت دی گئی تھی ، لیکن ابھی بھی لوگوں کی بڑی تعداد کے جمع ہونے پر پابندی عائد ہے۔
عالمی وبائی مرض کورونا وائرس (کووڈ ۔19) کے انفیکشن سے بری طرح متاثر برطانیہ میں اب تک اس وبائی مرض کی وجہ سے ، 34،546 افراد ہلاک ہوچکے ہیں۔
