قومی تفتیشی ایجنسی (این آئی اے) نے حیدرآباد میں درج وشاکھاپٹنم جاسوسی کیس کا کلیدی ملزم گٹیلی عمران کو گرفتار کیا ہے۔
این آئی اے نے بتایا کہ ملزم عمران کو گرفتار کرلیا گیا ہے۔ اسے جاسوسی کی سرگرمیوں میں ملوث ہونے اور پاکستانی خفیہ ایجنسی آئی ایس آئی کے لئے کام کرنے کے الزام میں تعزیرات ہند کی دفعہ 120 بی اور 121 اے، یو اے (پی) ایکٹ کی دفعہ 17 اور 18 اور سرکاری راز ایکٹ کی دفعہ 3تین کے تحت گرفتار کیا گیا ہے۔
ایجنسی نے عمران کے گھر تلاشی لی اور کچھ ڈیجیٹل سامان اور خفیہ دستاویز ضبط کیں۔
یہ کیس ایک بین الاقوامی جاسوسی ریکیٹ سے متعلق ہے جس میں پاکستان میں مقیم جاسوسوں نے بھارتی بحری جہازوں، آبدوزوں اور دیگر دفاعی تنصیبات کے مقامات / سرگرمیوں کے بارے میں حساس اورخفیہ معلومات جمع کرنے کے لئے بھارت میں ایجنٹوں کو بھرتی کیا تھا۔
این آئی اے کی تحقیقات سے انکشاف ہوا ہے کہ کچھ بحری عملہ فیس بک اور واٹس ایپ جیسے سوشل میڈیا پلیٹ فارم کے ذریعے پاکستانی ایجنٹوں کے رابطے میں آئے اور انہوں نے بھارت میں آئی ایس آئی کے ایجنٹوں کے ذریعے خفیہ معلومات شیئر کیں۔ بدلے میں آئی ایس آئی نے اسے بھاری رقم ادا کی۔
تفتیشی ایجنسی نے رواں برس 15 جون کو 14 ملزمان کے خلاف چارج شیٹ دائر کی تھی۔
اب تک کی تفتیش میں یہ بات سامنے آئی ہے کہ گرفتار ملزم عمران سرحد کے اس پار ٹیکسٹائل کی تجارت کے لئے پاکستانی جاسوسوں اور ایجنٹوں کے ساتھ جڑا ہوا تھا۔
این آئی اے افسران نے بتایا کہ 'پاکستان میں مقیم جاسوسوں کی ہدایت کے مطابق انہوں نے حساس اور انٹیلی جنس معلومات کے عوض بحریہ کے اہلکاروں کے بینک کھاتوں میں باقاعدہ وقفوں سے فنڈز جمع کروائے'۔
