ہیلسنکی: فن لینڈ نے مسلسل چھٹی مرتبہ دنیا کے سب سے خوش ملک کا خطاب برقرار رکھا ہے۔ ورلڈ ہیپی نیس رپورٹ 2023 نے پیر کو یہ اطلاع دی۔ رپورٹ میں کہا گیا ہےکہ فن لینڈ مسلسل چھٹے سال دنیا کا سب سے خوش ملک ہے۔ سروے کے مطابق جنگ زدہ افغانستان اور لبنان دنیا کے دو ناخوش ترین ممالک ہیں۔ فن لینڈ کے علاوہ ٹاپ ٹین ممالک کی فہرست میں ڈنمارک، آئس لینڈ، اسرائیل، ہالینڈ، سویڈن، ناروے، سوئٹزرلینڈ، لکسمبرگ اور نیوزی لینڈ بھی شامل ہیں۔ مزید برآں، لتھوانیا 2017 کے بعد سے ٹاپ 20 میں داخل ہونے والا واحد نیا ملک ہے، جو 30 سے زیادہ مقام پر تھا۔
ورلڈ ہیپی نیس رپورٹ- جو اقوام متحدہ کے پائیدار ترقی کے نیٹ ورک کے ذریعہ شائع کی گئی ہے- خوشی کے لحاظ سے ممالک کی درجہ بندی کرتی ہے جو کہ ان کی اوسط زندگی کی تشخیص کے پچھلے تین سالوں کے اعداد و شمار پر مبنی ہے۔ ورلڈ ہیپی نیس رپورٹ 2012 سے ہر سال جاری کی جاتی ہے، جس کا تخمینہ رائے عامہ کے جائزوں کے نتائج کے ساتھ ساتھ فی کس آمدنی، سماجی حیثیت، متوقع عمر، شہری آزادیوں، ملازمتوں کے تحفظ، بدعنوانی کی سطح پر لگایا جاتا ہے۔
20 مارچ کو منائے جانے والے خوشی کے عالمی دن کے موقع پر جاری کی گئی رپورٹ میں 150 سے زائد ممالک کے لوگوں سے خوشی کی بنیاد پر سروے کے اعداد و شمار کی درجہ بندی کی گئی ہے۔ رپورٹ کے مطابق بھارت 136 ممالک میں 125 ویں نمبر پر ہے جس سے وہ دنیا کے سب سے کم خوش ممالک میں سے ایک ہے۔ یہاں تک کہ یہ اپنے پڑوسی ممالک جیسے نیپال، چین، بنگلہ دیش اور سری لنکا سے بھی پیچھے ہے۔ فہرست میں سب سے نیچے افغانستان 137 ویں نمبر پر ہے۔ (یو این آئی مشمولات کے ساتھ)
