واشنگٹن: امریکی صدر جو بائیڈن اور ان کی اہلیہ نے رمضان المبارک کے آغاز پر دنیا بھر کے مسلمانوں کو مبارکباد پیش کی ہے۔ صدر بائیڈن اور خاتون اول جِل بائیڈن نے ایک بیان میں کہا کہ رمضان المبارک منانے والے میرے ساتھی امریکیوں اور دنیا بھر کے مسلمانوں، ہم آپ کے لیے مبارک اور پرامن رمضان کی دعا کرتے ہیں۔ بیان میں کہا گیا ہے کہ امریکہ اس مقدس وقت میں مشکلات اور تباہی کا شکار مسلم کمیونٹیز کے لیے اپنی حمایت کا اعادہ کرتا ہے۔ بائیڈن نے کہا کہ ہم ترکیہ اور شام کے لوگوں کے ساتھ کھڑے رہیں گے جنہوں نے حالیہ تباہ کن زلزلوں کے دوران بہت سے پیاروں کو کھو دیا ہے اور پاکستان کے لوگوں کے ساتھ، جو گزشتہ موسم گرما کے سیلاب کے بعد اپنی زندگیوں کی تعمیر نو کر رہے ہیں۔
بیان میں کہا گیا کہ پرامن طریقے سے اور کھلے عام اپنے عقائد پر عمل کرنے، دعا کرنے اور تبلیغ کرنے کے عالمی انسانی حق کو اجاگر کرتے ہوئے امریکہ ان مسلمانوں کے ساتھ یکجہتی کے لیے کھڑا ہے جو عوامی جمہوریہ چین میں ایغوروں سمیت برما میں روہنگیا، اور دنیا بھر میں دیگر مسلم کمیونٹیز جو ظلم کا سامنا کر رہے ہیں۔ ایک الگ بیان میں، سکریٹری آف اسٹیٹ اینٹونی بلنکن نے کہا کہ ریاستہائے متحدہ اور بیرون ملک مسلمانوں کے لیے، رمضان دعا اور غور و فکر، ہمدردی اور کشادہ دلی کے ساتھ کم نصیبوں کو یاد کرنا اور ان کی خدمت کرنے کا ایک مقدس مہینہ ہے۔
یہ بھی پڑھیں:
- Ramadan 2023 رواں برس سب سے طویل اور قلیل روزے کن ممالک میں ہوں گے؟
- Importance of Ramadan رمضان المبارک کی فضیلت قرآن و حدیث کی روشنی میں
بلنکن نے کہا کہ یہ ایسا وقت بھی ہے کہ ہم ضرورت مندوں کی مدد، غربت، ظلم و ستم، تنازعات اور قدرتی آفات سے متاثرہ افراد کی اپنی اجتماعی ذمہ داری پر عمل کریں۔ انہوں نے مزید کہا کہ دنیا بھر کے مسلمان اپنی برادریوں میں خدمت کے کاموں کے ذریعے اس مہینے کو گزارتے ہیں۔ اس جذبے کے تحت، بیرون ملک ہمارے بہت سے سفارت خانے اور قونصل خانے اس مہینے کی خوبصورت روایات میں شریک ہونے کے لیے افطار اور دیگر تقریبات کی میزبانی کریں گے اور ہماری کمیونٹیز کے اندر سماجی ہم آہنگی، شمولیت اور تنوع کو فروغ دینے کے لیے ہماری وابستگی کا مظاہرہ کریں گے۔ سیکرٹری خارجہ نے کہا کہ ہم مسلم دنیا کی متنوع برادریوں کے ساتھ اپنی دیرینہ شراکت کے لیے گہری تعریف کا اظہار کرتے ہیں اور اندرون اور بیرون ملک سبھی کے لیے مذہبی آزادی کو فروغ دینے کے لیے پرعزم ہیں۔ میں دنیا بھر کے 1.8 بلین مسلمانوں کو رمضان کریم کی مبارکباد دیتا ہوں۔
