لندن: برطانیہ کے وزیر اعظم رشی سنک نے اتوار کو کنزرویٹو پارٹی کے سربراہ ندیم زہاوی کو ذاتی ٹیکس کے معاملے میں تحقیقات کے بعد پارٹی سربراہی کے عہدے سےبرطرف کر دیا۔ سی این این نے رپورٹ کے مطابق رشی سنک کے حکم پر حالیہ تحقیقات میں انکشاف ہوا ہے کہ ندیم زہاوی نے وزارتی ضابطہ کی سنگین خلاف ورزی کی ہے، جس کی وجہ سے ان کو ان کے عہدے سے برطرف کردیا گیا ہے۔
رشی سنک نے گزشتہ ہفتے اپنے اخلاقیات کے مشیر لوری میگنس کو حکم دیا تھا کہ وہ زہاوی کے ٹیکس معاملات کی تحقیقات کریں جس کے بعد یہ انکشاف ہوا ہے کہ ندیم زہاوی نے وزارتی ضابطہ کی سنگین خلاف ورزی کی ہے۔ رشی سنک نے زہاوی کو دیے گئے برطرفی کے خط میں کہا کہ یہ واضح ہوا ہے کہ وزارتی ضابطہ کی سنگین خلاف ورزی ہوئی ہے، جس کے نتیجے میں، میں نے آپ کو اپنی حکومت میں آپ کے عہدے سے برطرف کرنے کے اپنے فیصلے سے آگاہ کر دیا ہے۔
دی گارڈین کے مطابق، برطانیہ کے وزیر اعظم کے اخلاقیات کے مشیر لوری میگنس کی تحقیقات سے یہ نتیجہ اخذ کیا گیا ہے کہ زہاوی نے حکام کو یہ نہیں بتایا کہ وہ ٹیکس باڈی کے زیرِ تفتیش تھے جب انہیں سابق وزیر اعظم بورس جانسن نے وزیر خزانہ مقرر کیا تھا۔ وہ سرکاری طور پر یہ اعلان کرنے میں بھی ناکام رہے کہ انہوں نے ٹیکس سے بچنے کے لیے ریونیو اور کسٹمز محکمہ کے ساتھ سمجھوتہ کیا تھا۔
سی این این کی رپورٹ کے مطابق، زہاوی کے ٹیکس حکام کے ساتھ ملٹی ملین پاؤنڈ کے تصفیے کی رپورٹوں نے برطانوی شہریوں کو چونکا دیا۔ دلچسپ بات یہ ہے کہ خود رشی سنک کو ان کی اہلیہ اکشتا مورتی کے ٹیکس انتظامات پر بھی جانچ پڑتال کی گئی ہے، جو ایک بھارتی ارب پتی کی بیٹی ہے۔ پچھلے سال، سنک اور مورٹی برطانیہ کے 250 امیر ترین افراد کی سنڈے ٹائمز کی امیر ترین فہرست میں ظاہر ہوئے تھے۔
یہ بھی پڑھیں: UK PM Sunak apologizes برطانوی وزیراعظم رشی سنک کی سیٹ بیلٹ نہ باندھنے پر معذرت
اتوار کو شائع ہونے والی اپنی برطرفی کے جواب میں ایک خط میں، ندیم زہاوی نے کہا کہ برطانیہ کی یکے بعد دیگرے حکومتوں میں خدمات انجام دینا ان کی زندگی کا اعزاز رہا ہے لیکن انہوں نے ٹیکس کے امور سے متعلق رپورٹ کا کوئی حوالہ نہیں دیا۔ بیان میں انھوں نے مزید کہا کہ میں ظلم و ستم سے بھاگ کر اور انگریزی نہیں بولتے ہوئے اس ملک میں پہنچا، میں نے یہاں ایک کامیاب کاروبار بنایا اور حکومت کے چند اعلیٰ ترین دفاتر میں خدمات انجام دیں۔ مجھے یقین ہے کہ دنیا کے کسی اور ملک میں میری ایسی کہانی ممکن نہیں ہوگی۔
واضح رہے کہ عراقی نژاد برطانوی سیاست دان ندیم زہاوی کو سابق وزیر اعظم بورس جانسن نے گزشتہ سال جولائی میں وزیر خزانہ مقرر کیا تھا۔ اس کے بعد لز ٹرس اور ان کے جانشین رشی سنک کے تحت کابینہ میں رہے جنہوں نے انہیں پارٹی کا چیئرمین بنایا تھا۔
