Putin Likely to Attend G20 Summit in India روسی صدر پوتن کی بھارت میں جی ٹوئنٹی سربراہی اجلاس میں شرکت متوقع

بھارت نے پوتن کو G20 سربراہی اجلاس میں مدعو کیا ہے اور کریملن نے باضابطہ طور پر اس دعوت کو قبول بھی کر لیا ہے لیکن اس حوالے سے کوئی حتمی فیصلہ نہیں کیا ہے۔ گذشتہ سال جنگ کی وجہ سے امریکہ اور اس کے اتحادیوں کے دباؤ کے پیش نظر پوتن نے انڈونیشیا میں ہونے والے سربراہی اجلاس میں شرکت نہیں کی تھی بلکہ ان کی جگہ وزیر خارجہ سرگئی لاوروف نے اجلاس میں شرکت کی تھی۔

نئی دہلی: رواں برس ستمبر میں دہلی میں ہونے والے جی 20 سربراہی اجلاس میں روسی صدر ولادیمیر پوتن کے شرکت کا امکان ہے۔ اطلاعات کے مطابق، روسی صدر کا دفتر کریملن پوتن کے شیڈول کو منظوری دینے کے لیے کام کر رہا ہے تاکہ گزشتہ دو سربراہی اجلاسوں کو چھوڑ نے کے بعد روسی صدر کے لیے اس اجلاس میں شرکت کرنا ممکن بنایا جا سکے۔ میڈیا رپورٹس میں کہا گیا ہے کہ اگرچہ کریملن فی الحال اس پر غور کر رہا ہے تاہم اس حوالے سے کوئی حتمی فیصلہ نہیں کیا گیا ہے۔ اس حوالے سے کوئی باضابطہ تصدیق بھی جاری نہیں کی گئی ہے، حالانکہ بھارت نے پوتن کو باضابطہ دعوت دی ہے اور کریملن نے اسے قبول بھی کر لیا ہے۔

رپورٹ میں یہ بھی کہا گیا ہے کہ کریملن ولادی ووستوک میں سالانہ اقتصادی فورم کی تیاری کر رہا ہے، جو سربراہی اجلاس کے موقع پر 9-10 ستمبر کو مقرر کیا گیا تھا۔ رپورٹ میں ذرائع کے حوالے سے کہا گیا ہے کہ اس فورم کو ایک ہفتہ بعد منتقل کیا گیا اور اور اس امکان کو کھلا چھوڑ دیا تاکہ بھارت اور چین کے سینئر حکام اس فورم میں شرکت کر سکیں۔جہاں بھارت نے پوتن کو G20 سربراہی اجلاس میں مدعو کیا ہے اور کریملن نے باضابطہ طور پر اس دعوت کو قبول کر لیا ہے۔