واشنگٹن: امرت پال سنگھ کے خلاف کریک ڈاؤن کیے جانے کے بعد سے خالصتان حمایت یافتہ مظاہرین کے ایک گروپ نے اتوار کے روز سان فرانسسکو میں بھارتی قونصل خانے پر حملہ کیا اور اسے نقصان پہنچایا۔ بھارتی امریکیوں کی جانب سے اس فعل کی شدید مذمت کی گئی اور اس کے ذمہ داروں کے خلاف فوری کارروائی کا مطالبہ بھی کیا گیا۔ قابل ذکر ہے کہ اس سے قبل اتوار کے روز لندن میں بھارتی ہائی کمیشن کی عمارت کے باہر ایک خالصتانی حامی نے قومی پرچم اتار کر خالصتانی پرچم لگا دیا تھا۔ فاؤنڈیشن فار انڈیا اینڈ انڈین ڈائاسپورا اسٹڈیز (FIIDS) نے خالصتان کے حامی مظاہرین کے حملے کے بعد کہا کہ ہم لندن کے بعد سان فرانسسکو میں قونصل خانہ، دونوں جگہوں میں امن و امان کی مکمل ناکامی سے بھی حیران ہیں جہاں چند بنیاد پرست علیحدگی پسندوں نے بھارت کے سفارتی مشنوں پر حملہ کیا۔
دراصل آج سان فرانسسکو میں خالصتان کے حق میں نعرے لگاتے ہوئے، مظاہرین نے سٹی پولیس کی طرف سے کھڑی کی گئی عارضی حفاظتی رکاوٹوں کو توڑ دیا اور قونصل خانے کے احاطے کے اندر دو نام نہاد خالصتانی جھنڈے لگا دیے لیکن قونصل خانے کے دو اہلکاروں نے جلد ہی ان جھنڈوں کو ہٹا دیا۔ اس کے فوراً بعد مشتعل مظاہرین کا ایک گروپ قونصل خانے کے احاطے میں داخل ہوا اور اپنے ہاتھوں میں موجود سلاخوں سے دروازے اور کھڑکیوں کو مارنا شروع کر دیا۔ سان فرانسسکو پولیس کی جانب سے واقعے پر فوری طور پر کوئی تبصرہ نہیں کیا گیا۔
کمیونٹی لیڈر اجے بھٹوریا نے سان فرانسسکو میں بھارت کے قونصلیٹ کی عمارت پر خالصتان حامی مظاہرین کے حملے کی شدید مذمت کی۔ انہوں نے کہا کہ تشدد کا یہ عمل نہ صرف امریکہ اور بھارت کے درمیان سفارتی تعلقات کے لیے خطرہ ہے بلکہ ہماری کمیونٹی کے امن اور ہم آہنگی پر بھی حملہ ہے۔ بھٹوریا نے مقامی حکام پر زور دیا کہ وہ اس حملے کے ذمہ داروں کے خلاف فوری کارروائی کریں اور انہیں انصاف کے کٹہرے میں لایا جائے۔ انہوں نے مزید کہا کہ میں اپنی کمیونٹی کے تمام افراد سے بھی کہتا ہوں کہ وہ متحد ہو کر امن اور ہم آہنگی کو فروغ دیں۔
یہ بھی پڑھیں:
وہیں ایف آئی آئی ڈی ایس نے کہا کہ یہ دیکھنا انتہائی تشویشناک ہے کہ برطانیہ اور امریکہ سفارتی مشنوں کے تحفظ کے لیے ویانا کنونشن کے مطابق وعدوں کو پورا کرنے میں ناکام رہے ہیں۔ ہم امن و امان کے محکمے جیسے محکمہ ہوم لینڈ سیکیورٹی (ڈی ایچ ایس)، ایف بی آئی اور سی آئی اے پر زور دیں گے کہ وہ اس بات کو یقینی بنائیں کہ دہشت گردی کو ریاستہائے متحدہ امریکہ میں کوئی جگہ اور حمایت نہ ملے۔ انھوں نے یہ بھی کہا کہ پاکستان کی خفیہ ایجنسی آئی ایس آئی جھوٹے پروپیگنڈے کے ذریعے سکھ بنیاد پرستی کو اکسانے اور فنڈنگ کرنے کے پیچھے ہے۔ ایف آئی آئی ڈی ایس نے کہا کہ ہم سکھوں کی اکثریت سمیت بھارتی امریکیوں سے انتہاپسندی کے خلاف کھڑے ہونے کا مطالبہ کرتے ہیں۔
واضح رہے کہ بھارت نے گزشتہ اتوار کی شام نئی دہلی میں برطانیہ کے سب سے سینئر سفارت کار کو طلب کیا اور برطانیہ کی حکومت پر علیحدگی پسند اور انتہا پسند قوتوں کے خلاف حفاظتی اقدامات نہ کرنے پر سخت احتجاج کیا، جنہوں نے اتوار کو لندن میں بھارتی ہائی کمیشن پر حملہ کیا تھا۔ تاہم، بہت سے لوگوں نے ہائی کمیشن کے ایک اہلکار کی جرات مندانہ کارروائی کی تعریف کی جسے خالصتان کا جھنڈا پھینکتے ہوئے دیکھا گیا۔
