فلپائن میں ایک صوبائی گورنر اور پانچ دیگر افراد کو نامعلوم مسلح افراد نے گولی مار کر ہلاک کر دیا ہے۔ الجزیرہ کی رپورٹ کے مطابق پولیس نے بتایا کہ چھ مشتبہ افراد مسلح خدمات انجام دینے والوں کی وردیوں میں ملبوس رائفل کے ساتھ پامپلونا قصبے میں گورنر کے گھر میں داخل ہوئے اور فائرنگ شروع کر دی۔ ہلاک شدہ گورنر کی بیوہ نے بتایا کہ نیگروس اورینٹل صوبے کے گورنر روئل ڈیگامو اور پانچ دیگر افراد اس فائرنگ میں مارے گئے۔
پامپلونا کے میئر جینس ڈیگامو نے فیس بک پر پوسٹ کی گئی ایک ویڈیو میں کہا کہ گورنر ڈیگامو اس قسم کی موت کے مستحق نہیں تھے، وہ ہفتے کے روز اپنے حلقوں کی خدمت کر رہے تھے۔ فلپائن میں سیاست دانوں پر حملوں کی طویل تاریخ میں 56 سالہ ڈیگامو کو نشانہ بنایا جانے والا تازہ ترین واقعہ ہے۔ گزشتہ سال مقامی انتخابات کے بعد گولی مار کر کسی کو ہلاک کرنے والا کم از کم یہ تیسرا واقعہ ہے۔
صدر فرڈینینڈ مارکوس نے سیاسی اتحادی ڈیگامو کے قتل کی مذمت کی اور اس کے قاتلوں کو جلد انصاف دلانے کا وعدہ کیا۔ قابل ذکر ہے کہ پچھلے مہینے، سپریم کورٹ نے دوبارہ گنتی کے بعد ڈیگامو کو نیگروس اورینٹل گورنر شپ کے مقابلے کو فاتح قرار دیا تھا، اس سے پہلے ان کے مقامی حریف کو فاتح قرار دیا جا چکا تھا۔
یہ بھی پڑھیں:
واضح رہے کہ جنوبی صوبے لاناؤ ڈیل سور کے گورنر میمنٹل ایڈیونگ کو فروری میں ایک حملے میں گولی مار کر زخمی کر دیا گیا تھا جبکہ اس حملے میں ان کا ڈرائیور اور تین پولیس اسکارٹس ہلاک ہو گئے تھے۔ اسی مہینے اپری کے شمالی قصبے کے نائب میئر رومیل المیڈا اور ان کے ساتھ سفر کرنے والے پانچ دیگر افراد کو ہائی وے پر گھات لگا کر گولی مار کر ہلاک کر دیا گیا تھا۔
اس کے علاوہ طاقتور جنوبی قبیلے کے رہنماؤں اور تقریباً دو درجن پیروکاروں کو 2009 میں صوبہ ماگوئینڈانو میں گورنری کے انتخابی حریف کے حامیوں پر حملے کے الزام میں عمر قید کی سزا سنائی گئی۔ اس حملے میں سیاستدان کی اہلیہ اور رشتہ داروں سمیت 32 صحافیوں اور میڈیا ورکرز سمیت 58 افراد ہلاک ہوئے تھے۔
