اسلام آباد: پاکستان کی وزیر مملکت برائے خارجہ امور حنا ربانی کھر نے کہا ہے کہ ان کا ملک امریکا اور چین کے درمیان جاری دشمنی میں کسی کا ساتھ دینے پر مجبور نہیں ہونا چاہتا۔ انہوں نے کہا کہ اسلام آباد کے پہلے ہی اپنے بہت سے مسائل ہیں۔ رواں ہفتے واشنگٹن کے نیوز آؤٹ لیٹ پولیٹیکو کے ساتھ ایک انٹرویو میں حنا ربانی کھر نے کہا کہ اسلام آباد کو واشنگٹن اور بیجنگ کے درمیان بڑھتی ہوئی عالمی دشمنی کے درمیان کسی ایک فریق کو منتخب کرنے کی کوئی خواہش نہیں ہے۔ پاکستان کو اب دنیا کی دو بڑی سپر پاورز کے درمیان کسی فریق کا انتخاب کرنے کی ضرورت نہیں۔انہوں نے مزید کہا کہ اسلام آباد اپنے تعلقات کو قدر کی نگاہ سے دیکھتا ہے اور دونوں ممالک کے ساتھ توازن برقرار رکھنا چاہتا ہے۔
یہ انٹرویو ایک ایسے موقع پر ریکارڈ کیا گیا جب امریکی صدر جو بائیڈن نےکیلیفورنیا میں ایک سیاسی تقریب کے دوران اپنے چینی ہم منصب شی جن پنگ کو آمر کہا، اس تبصرے پر بیجنگ نے غم و غصے کا اظہار کرتے ہوئے کہا کہ یہ ریمارکس بنیادی حقائق سے متصادم، سفارتی آداب کی سنگین خلاف ورزی اور چین کے سیاسی وقار کی سنگین خلاف ورزی کرتے ہیں۔ واشنگٹن میں سیاسی تجزیہ کاروں نے خبردار کیا ہے کہ جو بائیڈن کے ریمارکس اور بیجنگ کے ردعمل سے پاکستان جیسے ممالک کے لیے چین اور امریکا دونوں کے ساتھ تعلقات برقرار رکھنا مشکل ہو جائے گا۔
پاکستان کی وزیر مملکت برائے خارجہ امور حنا ربانی کھر نے زور دے کر کہا کہ اسلام آباد امریکہ چین دشمنی کا حصہ نہیں بن سکتا، یہ اسلام آباد کے لیے خطرہ ہے۔انہوں نے کہا کہ 250 ملین کی آبادی کے ساتھ جوہری ہتھیاروں سے لیس پاکستان ایشیا میں اسٹریٹجک اثر و رسوخ کے مقابلے میں سب سے آگے ہے۔ کھر نے کہا کہ اسلام آباد امریکہ اور چین دشمنی کو بہت سنجیدگی سے دیکھتا ہے۔ ہمیں اس دشمنی پر بہت تشویش ہے۔وزیر مملکت برائے خارجہ امور حنا ربانی کھر نے کہا کہ امریکہ اور چین دونوں کے ساتھ ہمارے قریبی تعلقات رہے ہیں۔ ایسے میں ہم کسی کا ساتھ نہیں لے سکتے۔
یہ بھی پڑھیں:
- چینی قرضوں کی تجدید پاکستان کے ساتھ چین کی لازوال دوستی کا نمونہ، شہباز شریف
- پاکستان۔ چین تجارتی شاہراہ تین برس بعد دوبارہ کھول دی گئی
تاہم، حنا ربانی کھر نے اصرار کیا کہ امریکہ اور چین کے درمیان ہر طرح سے ٹوٹ پھوٹ پاکستان کو یعنی پاکستان دو میں سے کسی ایک فریق کے انتخاب کی مشکل صورتحال سے دوچار کردے گی، دنیا کو دو بلاکوں میں تقسیم کرنے کے اس تصور سے ہمیں بہت خطرہ ہے، کوئی بھی چیز جو دنیا کو مزید تقسیم کرے، ہم اس حوالے سے بہت فکر مند ہیں۔انہوں نےکہا کہ ہماری امریکہ کے ساتھ قریبی تعلقات کی تاریخ ہے، ہمارا اسے ترک کرنے کا کوئی ارادہ نہیں، پاکستان کا چین سے قریبی تعاون بھی حقیقت پر مبنی ہے اور یہ ہمیشہ ایسا ہی تھا، یہاں تک کہ ہر کوئی چین کو خطرہ تصور کرنے لگا۔ (یو این آئی مشمولات کے ساتھ)
