Rwanda Floods روانڈا میں سیلاب سے نو ہزار سے زائد افراد بے گھر

روانڈا میں شدید بارش کے نتیجے میں آنے والے سیلاب اور لینڈ سلائیڈنگ میں کم از کم 131 افراد ہلاک اور 94 دیگر زخمی ہو گئے۔ وہیں سیلاب سے تقریباً نو ہزار سے زائد افراد بے گھر ہو گئے ہیں۔ many people homeless due to floods in Rwanda

کگلی: رواں ہفتے روانڈا میں آنے والے سیلاب کے بعد 9,000 سے زیادہ افراد بے گھر ہو گئے ہیں۔ افسران نے پیر کو یہ اطلاع دی۔ انہوں نے بتایا کہ تقریباً 5598 خاندانوں کو محفوظ مقامات پر منتقل کیا گیا ہے اور حکومت ان بے گھر افراد کو بنیادی سہولیات فراہم کر رہی ہے۔ سیلاب سے متاثرہ لوگوں کی باز آباد کاری کے لیے جائزہ لیا جا رہا ہے، تاکہ تمام خاندان کو ہر ممکن ضروریات فراہم کی جاسکیں۔ انہوں نے کہا کہ کرائے کی رہائش گاہوں میں رہنے والوں کو کرائے کی رہائش پر دوبارہ آباد کرنے میں مدد کی جائے گی اور جو لوگ اپنے گھر کھو چکے ہیں انہیں بھی معقول رہائش فراہم کی جائے گی۔ روانڈا کے مغربی، شمالی اور جنوبی صوبوں میں منگل اور بدھ کو شدید بارشوں کے نتیجے میں آنے والے سیلاب اور لینڈ سلائیڈنگ میں کم از کم 131 افراد ہلاک اور 94 دیگر زخمی ہو گئے۔ ان میں سے 34 لوگ اب بھی اسپتال میں داخل ہیں۔ جبکہ ایک تاحال لاپتہ ہے۔

انہوں نے کہا کہ ملک میں قدرتی آفت میں 5550 سے زائد مکانات، 14 سڑکیں اور 50 سے زائد اسکول تباہ ہوگئے۔ اس کے علاوہ فصلوں، پانی اور بجلی سمیت دیگر انفراسٹرکچر کو بھی نقصان پہنچا ہے۔ حکومت نے تمام متاثرہ علاقوں کے لوگوں کو جلد از جلد محفوظ مقامات پر منتقل کرنے کی اپیل کی ہے۔ دریں اثنا، انفراسٹرکچر کے وزیر ارنسٹ نسبیمانا نے کہا کہ حکومت کو ملک میں آفات سے تباہ ہونے والے بنیادی ڈھانچے کی تعمیر نو کے لیے تقریباً 9.83 کروڑ ڈالر کی ضرورت ہے۔ اس کے علاوہ، اس رقم میں تباہ شدہ قومی سڑکوں کے لیے 41 ارب روانڈا فرینک، پلوں کی تعمیر نو کے لیے 38 ارب روانڈا فرینک اور بجلی کے بنیادی ڈھانچے کے لیے پانچ ارب روانڈا فرانک شامل ہیں۔

یو این آئی