تہران: ایران کی ایک تکنیکی ٹیم منگل کو سعودی عرب کا دورہ کرے گی تاکہ ریاض میں ایرانی سفارت خانے کو دوبارہ کھولنے کی تیاری کا جائزہ لے سکے۔ ایران کی تسنیم خبر رساں ایجنسی نے اتوار کو اطلاع دی کہ تکنیکی ٹیم ایرانی سفارت خانے کی عمارت کا دورہ کرے گی اور اسے دوبارہ کھولنے کے لیے گراؤنڈ تیار کرے گی۔ ایرانی وزارت خارجہ کے ڈائریکٹر جنرل علی رضا عنایتی نے اس خبر کی تصدیق بھی کی ہے۔
قابل ذکر ہے کہ ہفتے کے روز سعودی عرب کا ایک تکنیکی وفد ایران میں صورتحال کا جائزہ لینے اور ملک میں سعودی سفارتخانے اور قونصل خانوں کو دوبارہ کھولنے کے طریقہ کار پر بات چیت کے لیے تہران پہنچا ہے۔ وفد کی سربراہی سینئر سفارتکار ناصر بن عوض آل غنوم کر رہے ہیں۔ ذرائع نے سعودی پریس ایجنسی کا حوالہ دیتے ہوئے روپرٹ کیا کہ یہ دورہ بیجنگ میں دو طرفہ تعلقات کو معمول پر لانے کے لیے دونوں ممالک کے درمیان ہونے والے معاہدوں کے بعد ہوا ہے۔
یہ بھی پڑھیں:
- سعودی تکنیکی وفد سفارتی مشن کی بحالی پر بات چیت کیلئے ایران پہنچ گیا
- ایران اور سعودی عرب کے وزرائے خارجہ کی چین میں سات سال بعد ملاقات
واضح رہے کہ جمعرات کو ایرانی وزیر خارجہ حسین امیر عبداللہیان اور ان کے سعودی ہم منصب شہزادہ فیصل بن فرحان آل سعود نے بیجنگ میں ایک مشترکہ بیان پر دستخط کیے۔ جس میں سفارتی تعلقات بحال کرنے کا اعلان کیا گیا۔ سعودی عرب نے 2016 میں ایران میں سعودی سفارتی مشن پر حملوں کے جواب میں ایران کے ساتھ سفارتی تعلقات منقطع کر لیے تھے۔
