میڈرڈ: ہسپانوی عدالت نے ایک شخص کو سابق اہلیہ سے 25 سالوں تک بلا معاوضہ گھریلو کام کرانے پر 2 لاکھ یورو ادا کرنے کا حکم دے دیا۔ غیر ملکی خبر رساں ادارے اے ایف پی کی رپورٹ کے مطابق ہسپانوی جوڑے کی دو بیٹیاں ہیں تاہم ان کی شادی جائیداد کی تقسیم کے نظام پر منحصر تھی جس میں واضح کیا گیا تھا کہ دونوں فریقین نے اپنی زندگی میں جو کچھ بھی کمایا، وہ اسی کا ہوگا۔ تاہم شادی کے عرصے کے دوران شوہر نے اہلیہ کو کام کرنے کی اجازت نہیں دی جس کے باعث بیوی کے پاس کمانے کا کوئی ذریعہ نہیں تھا۔ شادی کے بعد شوہر نے اپنی بیوی کو گھر کے کام کرنے تک ہی محدود رکھا تھا۔
سابقہ اہلیہ نے نام ظاہر نہ کرنے کی شرط پر بتایا کہ ان کے شوہر نہیں چاہتے تھے کہ وہ گھر سے باہر کام کریں، میں کچھ نہیں کر سکتی تھی اور میں نے خود کو خاص طور پر گھر کے کام، اپنے شوہر کی دیکھ بھال کے لیے وقف کر دیا تھا۔ تاہم جوڑے کے درمیان علیحدگی ہونے کے بعد خاتون نے اپنے شوہر پر مقدمہ دائر کیا، معاملہ جب عدالت پہنچا تو جج نے فیصلہ سناتے ہوئے شوہر کو حکم دیا کہ بلا معاوضہ گھریلو کام کرانے پر خاتون کو 2 لاکھ یورو ادا کیے جائیں۔ اس کے علاوہ سابق شوہر کو بیٹیوں کے لیے ماہانہ چائلڈ کیئر الاؤنس ادا کرنے کا بھی حکم دیا گیا۔ خاتون نے بتایا کہ ’وہ عدالت کے اس فیصلے سے بہت خوش ہیں‘۔
یہ بھی پڑھیں: Feroze Khan Denies Domestic Violence Allegation: پاکستانی اداکار فیروز خان نے گھریلو تشدد کے الزامات کو بے بنیاد قرار دیا
یو این آئی
