ٹوکیو: وسطی جاپان کے اشیکاوا صوبہ میں آنے والے تباہ کن زلزلے سے مرنے والوں کی تعداد بڑھ کر 84 ہو گئی ہے اور لاپتہ افراد کی تعداد 179 تک پہنچ گئی ہے، جب کہ راحت اور بچاؤ کے کام کے لئے 72 گھنٹے کی اہم مدت ختم ہوگئی ہے۔
قابل ذکر ہے کہ گزشتہ پیر کو اشیکاوا اور اس کے آس پاس کے علاقوں میں 7.6 شدت کے زلزلے کے جھٹکے محسوس کیے گئے تھے۔ مقامی حکام نے بتایا کہ طاقتور مرکزی جھٹکے کے بعد سینکڑوں آفٹر شاکس محسوس کیے گئے، جس سے صوبے میں کل ملاکر 305 افراد زخمی ہوگئے۔ کیوڈو نیوز کے مطابق، خیال کیا جا رہا ہے کہ بہت سے لوگ اب بھی زلزلے سے بری طرح متاثر ساحلی شہر واجیما میں ملبے کے نیچے پھنسے ہوئے ہیں، جہاں اب تک 48 افراد کی ہلاکت کی تصدیق ہو چکی ہے۔
یہ بھی پڑھیں:جاپان میں 7.4 شدت کا زلزلہ، سونامی کی وارننگ جاری
ماہرین کا کہنا ہے کہ زلزلے کے بعد پہلے 72 گھنٹے ریسکیو کے لیے خاص طور پر اہم ہوتے ہیں کیونکہ اس کے بعد زندہ بچ جانے کے امکانات بہت کم ہو جاتے ہیں۔ امدادی کارکنوں نے تقریباً 4 بجکر 28 منٹ پر واجیما قصبے میں ایک منہدم مکان سے ایک 80 سالہ خاتون کو باہر نکالا۔ مقامی وقت کے مطابق نوٹو جزیرہ نما میں آنے والے شدید زلزلے کے ٹھیک 72 گھنٹے بعد خاتون ہوش میں اور جوابدہ پائی گئی۔
(یو این آئی)
