آسٹریلیا کے وزیر اعظم اسکاٹ موریسن نے ملکی انتخابات Australia Election 2022 میں شکست تسلیم کر لی ہے۔ آسٹریلین لیبر پارٹی کے رہنما اینتھونی البانیز آسٹریلیا کے اگلے وزیر اعظم کا عہدہ سنبھالیں گے۔ آسٹریلیا کے عام انتخابات میں لیبر پارٹی کے رہنما اینتھونی البانیز نے تقریباً 10 سال اپوزیشن میں رہنے کے بعد اپنی پارٹی کو انتخابی فتح تک پہنچانے کے بعد ہفتے کے روز صحافیوں کو بتایا کہ "میں ملک کو متحد کرنا چاہتا ہوں، میرے خیال میں لوگوں میں انتشار کافی زیادہ ہو چکا ہے، لیکن اب وہ ایک قوم کے طور پر متحد ہونا چاہتے ہیں اور میں اس کی قیادت کرنے کا ارادہ رکھتا ہوں۔"
عام انتخابات کے جزوی نتائج کے مطابق، لیبر پارٹی نے اب تک 72 نشستیں حاصل کی ہیں، جو کہ پارلیمان کے 151 رکنی ایوان زیریں میں اکثریت سے چار نشستیں کم ہیں اور توقع ہے کہ ان کی پارٹی اکثریت کی تعداد حاصل کر لے گی۔ وزیر اعظم اسکاٹ موریسن کی قیادت میں لبرل نیشنل اتحاد نے اب تک 51 نشستیں ہی حاصل کی ہیں۔ موریسن نے ہفتہ کو دیر رات شکست تسلیم کر لی حالانکہ ووٹوں کی گنتی ابھی جاری تھی۔
اپنے حامیوں سے بات کرتے ہوئے موریسن نے کہا: "آج رات میں نے اپوزیشن لیڈر اور آنے والے نئے وزیر اعظم، اینتھونی البانیز سے بات کی ہے، اور میں نے انہیں انتخابی جیت پر مبارکباد دی ہے۔" اسکائی نیوز نے رپورٹ کیا کہ موریسن نے یہ بھی کہا کہ وہ لبرل پارٹی کے سربراہ کی حیثیت سے دستبردار ہو جائیں گے۔"سی این این کے ذریعہ ان کا حوالہ دیتے ہوئے کہا گیا کہ میں نے ہمیشہ آسٹریلیائیوں اور ان کے فیصلے پر یقین کیا ہے اور میں ہمیشہ ان کے فیصلے کو قبول کرنے کے لیے تیار رہا ہوں"۔ آسٹریلین براڈکاسٹنگ کارپوریشن نے ہفتے کی رات پیش گوئی کی کہ لیبر 2013 کے بعد پہلی بار حکومت بنائے گی، انتھونی البانیز ملک کے 31ویں وزیر اعظم ہوں گے۔
اینتھونی البانیز کون ہے؟
اینتھونی البانی، آسٹریلیا کے 31 ویں وزیر اعظم بننے کے لیے تیار ہیں، آسٹریلوی لیبر پارٹی کے رہنما ہیں اور اپوزیشن کے رہنما بھی رہ چکے ہیں۔ وہ 1996 سے آسٹریلیا میں پارلیمنٹ کے رکن کے طور پر خدمات انجام دے رہے ہیں۔ وہ 2013 میں آسٹریلیا کے نائب وزیراعظم بھی تھے اور 2007 اور 2013 کے درمیان کابینہ کے وزیر کے طور پر خدمات انجام دیں۔ 2022 کی انتخابی مہم میں، البانی کی لیبر پارٹی نے آسٹریلیا میں بڑھتی ہوئی افراط زر کے درمیان مزید مالی امداد اور ایک مضبوط سماجی تحفظ کا وعدہ کیا۔ پارٹی نے یہ بھی کہا کہ وہ 2050 تک گرین ہاؤس گیسوں کے اخراج میں 43 فیصد کمی کے ساتھ موسمیاتی تبدیلی سے نمٹنا چاہتی ہے۔
وزیراعظم نریندر مودی نے اینتھونی البانیز کو مبارک باد دی
اقتدار میں آنے کے فوراً بعد، اینتھونی البانی پیر کو جاپان میں کواڈ سربراہی اجلاس میں شرکت کے لیے روانہ ہوں گے اور امریکی صدر جو بائیڈن، جاپانی وزیر اعظم فومیو کشیدہ Fumio Kishida اور وزیراعظم نریندر مودی سے ملاقات کریں گے۔ وہیں پی ایم مودی نے ٹویٹر پر اینتھونی البانی کو مبارکباد دی۔ انہوں نے ٹویٹ کیا، "آسٹریلوی لیبر پارٹی کی جیت، اور آپ کے وزیر اعظم منتخب ہونے پر انتھونی البانی کو مبارکباد! میں اپنی جامع اسٹریٹجک شراکت داری کو مزید مضبوط بنانے، اور ہند-بحرالکاہل خطے میں مشترکہ ترجیحات کے لیے کام کرنے کا منتظر ہوں۔"
