ترکی میں خوفناک آتشزدگی، حکومت کو سازش کا شبہ

ترک صدر نے کہا کہ اگر یہ ثابت ہوا کہ آگ جان بوجھ کر لگائی گئی ہے تو سازشی عناصر کا سینہ چیر دیں گے، چاہے اس کی کچھ بھی قیمت دینا پڑے۔

ملک میں آگ لگنے کے واقعات میں ممکنہ سازش پر ترک صدر رجب طیب اردگان نے برہمی کا اظہار کیا ہے۔

عالمی خبررساں ایجنسی کے مطابق صدر رجب طیب اردگان نے متاثرہ علاقوں کے دورے کئے، اس موقع پر ان کا کہنا تھا کہ اشارے ملے ہیں کہ آگ لگنے کے واقعات کے پیچھے کوئی سازش ہے۔

ترک صدر نے کہا کہ اگر یہ ثابت ہوا کہ آگ جان بوجھ کر لگائی گئی ہے تو سازشی عناصر کا سینہ چیر دیں گے، چاہے اس کی کچھ بھی قیمت دینا پڑے۔

اسی درمیان خبر ہے کہ ترکی میں جنگل میں آگ لگانے کے شک میں ایک شخص گرفتار کیا گیا ہے۔ ترکی کی پولیس کو شک ہے کہ گرفتار ملزم نے ہی جنگلوں میں آگ لگانے کی شروعات کی تھی، اس کے بعد یہ آگ وسیع علاقے میں پھیل گئی۔

واضح رہے کہ ترکی کے جنوبی علاقوں میں آتشزدگی کے باعث اب تک دو فائر فائٹرز سمیت 6 افراد جاں بحق ہوچکے ہیں۔

خیال رہے ترکی کی میڈیا رپورٹوں میں بتایا گیاتھا کہ ملک میں خوفناک آتشزدگی کے تخریبی عناصر کار فرما ہیں اور یہ کہ آگ لگی نہیں بلکہ لگائی گئی ہے۔

یواین آئی۔