اسرائیل کی جانب سے فلسطین میں جاری بہیمانہ حملوں کے بعد کشیدہ صورتحال پر اقوام متحدہ کی جنرل اسمبلی کا اجلاس آج پھر منعقد ہوگا۔
جس میں شرکت کرنے کے لئے پاکستان کے وزیر خارجہ شاہ محمود قریشی نیو یارک پہنچ گئے ہیں۔ ان کے علاوہ ترکی، سوڈان اور فلسطین کے وزرائے خارجہ ایک ساتھ پہنچے ہیں۔
پاکستان کے وزیر خارجہ شاہ محمود قریشی نے میڈیا اہلکاروں سے بات کرتے ہوئے کہا کہ قبلہ اول کی بے حرمتی پر مسلم امہ کے اندر اضطراب ہے۔ پاکستان، فلسطینیوں کی سیاسی، اخلاقی، سفارتی معاونت جاری رکھے گا۔
معلوم ہو کہ فلسطینیوں پر اہک ہفتے سے زائد دنوں سے اسرائیل کی جانب سے جاری فضائی حملے میں قریب ڈھائی سو سے زائد لوگوں کی موت ہو چکی ہے جس پر اقوام متحدہ نے تشویش کا اظہار کرتے ہوئے اسرائیلی وزیراعظم سے حملہ روکنے کو کہا تھا لیکن اسرائیل اقوام متحدہ کی باتوں کو درکنار کرتے ہوئے فلسطینیوں پر لگاتار حملے جاری رکھا ہوا ہے۔
