ترکی کے صدر رجب طیب اردوان نے بدھ کے روز ابوظہبی کے ولی عہد شیخ محمد بن زید النہیان (UAE Crown Prince) کی میزبانی کی کیونکہ ترکی اور متحدہ عرب امارات اپنے کشیدہ تعلقات کو ٹھیک کرنے اور اقتصادی تعاون کو بڑھانے کے خواہاں ہیں۔
ترک صدر رجب طیب اردوان اور متحدہ عرب امارات کے ولی عہد محمد بن زید نے اقتصادی تعاون کے کئی معاہدوں پر دستخط کیے ہیں۔
ان معاہدوں میں دونوں ممالک کی اسٹاک ایکسچینج کے درمیان شراکت داری کا معاہدہ اور توانائی اور صحت کے شعبے میں تعاون کے ایگریمنٹس شامل ہیں۔ اس کے علاوہ دونوں ممالک نے باہمی دلچسپی کے علاقائی اور بین الاقوامی پیش رفت پر بھی تبادلہ خیال کیا۔
واضح رہے کہ ترک معیشت کو اس وقت بیرونی سرمایہ کاری کی سخت ضرورت ہے۔ حالیہ کچھ عرصے میں ترک کرنسی کی قدر میں نمایاں کمی واقع ہوئی ہے۔
ابوظبی کے ولی عہد شیخ محمد بن زاید نے کہا کہ ترک صدر سے ملاقات میں مفید مذاکرات کیے۔ اقتصادی تعلقات کو فروغ دینے کے امکانات پر زور دیا گیا ہے۔
انہوں نے مزید کہا کہ تعاون کے نئے راستے کھولنے کے متمنی ہیں۔ ہم چاہتے ہیں کہ مل کر دونوں ملک ایک دوسرے کے مفاد کے لیے کام کریں۔
وہیں ترک وزیر خارجہ نے کہا کہ اردوان اور محمد بن زاید کے مذاکرات بہت کامیاب رہے اور وہ دسمبر میں ابوظبی کا دورہ کریں گے۔
ابو ظہبی کے ولی عہد کا یہ دورہ، جسے متحدہ عرب امارات کی خارجہ پالیسی کے پس پردہ قوت کے طور پر دیکھا جارہا ہے، 2012 کے بعد سے ان کا ترکی کا پہلا سرکاری دورہ ہے اور تعلقات میں کشیدگی کے بعد سے کسی اماراتی اہلکار کا یہ اعلیٰ ترین دورہ ہے۔
ابوظہبی کے ولی عہد شیخ محمد بن زاید النھیان (UAE Crown Prince) ترکی کے سرکاری دورے پر بدھ کو انقرہ پہنچے تو ایوان صدارت آمد پر صدر رجب طیب اردگان نے خیر مقدم کیا۔
شیخ محمد بن زاید کا شاندار سرکاری استقبال ہوا، انہیں گارڈ آف آنر دیا گیا۔
