سعودی عرب میں رات سات بجے سے صبح چھ بجے تک کرفیو برقرار رہےگا۔ شاہ سلمان کے اس فیصلے پر عمل درآمد کا آغاز آج (پیر کی) شام سے کر دیا گیا ہے۔
سعودی پریس ایجنسی 'ایس پی اے' نے بتایا کہ شاہ سلمان بن عبد العزیز آل سعود نے شہریوں اور ملک میں مقیم غیرملکی باشندوں کی کورونا وائرس سے تحفظ کے لیے سخت حفاظتی انتظامات کیے ہیں۔
بیان میں کہا گیا ہے کہ شاہ سلمان بن عبدالعزیز آل سعود نے 28 رجب المرجب بمطابق 23 مارچ 2020ء سے اکیس روز تک رات کا کرفیو لگا دیا ہے۔
وزارت داخلہ ملک میں کرفیو کے اعلان پر عمل درآمد کو یقینی بنانے کے لیے اقدامات کرے گی۔ تمام سول اور فوجی ادارے وزارت داخلہ سے تعاون کے پابند ہوں گے۔
سرکاری اور نجی شعبوں کے ملازمین کرفیو کی پابندی سے مستثنیٰ ہوں گے۔ سکیورٹی، فوجی اور میڈیا شعبوں کے ملازمین، صحت اور بنیادی سروس فراہم کرنے والے اداروں کے کارکن بھی اس پابندی سے مستثنیٰ ہوں گے۔
خیال رہے کہ سعودی عرب میں کورونا سے چھ سو کے قریب افراد متاثر ہونے کی تصدیق کی جا چکی ہے۔
