ایران کے نیوکلیئر سائنس دان و جوہری پروگرام کے سربراہ محسن فخری زادہ کے قتل کے بعد ایران نے اسرائیل اور امریکہ کو انتباہ دیا ہے۔
ایران نے امریکہ اور اسرائیل کو 'مہم جوئی اقدامات' کے خلاف متنبہ کیا ہے اور اس بات پر زور دیا ہے کہ تہران کو اپنے مفادات کے تحفظ کا حق ہے ۔
- ناراضگی کا اظہار:
اقوام متحدہ میں ایران کے سفیر ماجد تخت راونچی نے محسن فخری زادہ کے قتل کے بعد اقوام متحدہ کے سکریٹری جنرل اور سلامتی کونسل کو ایک خط میں اپنی ناراضگی کا اظہار کیا ہے۔
راونچی نے اپنے خط میں لکھا ہے کہ 'ہمارے ملک کے خلاف ریاستہائے متحدہ امریکہ اور اسرائیل کی طرف سے کسی بھی مہم جوئی کے خلاف میں سخت انتباہ دیتا ہوں'۔
- 'ہمارے مفادات اہم'
انھوں نے کہا کہ 'خاص طور پر موجودہ انتظامیہ کے بقیہ عرصہ کے دوران اسلامی جمہوریہ ایران اپنے عوام کے دفاع کے لئے تمام ضروری اقدامات کرنے کا حق رکھتا ہے اور وہ اپنے مفادات کو ترجیج دے گا'۔
ایرانی وزارت دفاع نے جمعہ کے روز کہا تھا کہ اس کے تحقیقی و جدت مرکز کے جوہری ماہر طبعیات محسن فخریزادہ کو ہلاک کردیا گیا ہے۔
ایک ٹویٹر پوسٹ میں ایرانی وزیر خارجہ محمد جواد ظریف نے اسرائیل پر جوہری سائنسدان کی ہلاکت میں ملوث ہونے کا الزام عائد کیا۔
ایرانی وزیر خارجہ محمد جواد ظریف نے عالمی برادری سے اس فعل کی مذمت کرنے کا مطالبہ کیا، جسے انہوں نے ریاستی شدت پسندی قرار دیا ہے۔
