بحرین میں کورونا کے کیسز میں اچانک اضافہ ہوگیا ہے جس کی وجہ سے وہاں کی حکومت نے دو ہفتوں کے لیے مساجد میں نمازوں کی ادائیگی پر پابندی عائد کر دی ہے۔
وزارت برائے انصاف، اسلامی امور اور اوقاف نے اعلان کیا ہے کہ 11 فروری سے مساجد کم از کم دو ہفتوں کے لئے بند رہیں گی۔
یہ فیصلہ اسلامی امور برائے سپریم کونسل (ایس سی آئی اے) کی مذہبی رائے کی بنیاد پر اور سنی اور جعفری اوقاف کے ڈائریکٹوری کے تعاون سے لیا گیا جس کا مقصد بزرگ شہریوں اور دیگر افراد کو کورونا سے بچانا ہے۔
یہ بھی پڑھیں: مریخ کا سفر: متحدہ عرب امارات نے تاریخ رقم کی
وزارت نے کہا کہ 'نماز جمعہ اسلامی مرکز سے نمازیوں کی محدود تعداد کے ساتھ براہ راست نشر کی جائیں گی۔'
ملک کی وزارت صحت کے ایک بیان کے مطابق منگل کو کورونا وائرس کے 759 نئے کیسز ریکارڈ کیے گئے ہیں جس میں سے 660 افراد صحتیاب بھی ہوئے ہیں اور چار افراد کے ہلاک ہونے کی تصدیق ہوئی ہے۔
بحرین میں کورونا وائرس کے اب تک 6 ہزار 113 فعال کیسز رپورٹ ہوئے ہیں جن میں سے 46 کی حالت نازک بتائی جارہی ہے۔
