کئی بار ایسا ہوتا ہے کہ کھدائی کے دوران کچھ ایسی نایاب چیزیں مل جاتی ہیں کہ ہر کوئی حیران رہ جاتا ہے۔ ایسا ہی نظارہ اسرائیل میں دیکھنے کو ملا۔ جہاں کھدائی کے دوران 1100 سال پرانے اسلامک دور کے نایاب سکے ملے ہیں، اس کو دیکھ کر ہر کوئی حیران ہے۔
در اصل اسرائیل کے آثار قدیمہ نے پیر کو اعلان کیا ہے کہ انہیں یونے شہر کے پاس کھدائی کے دوران شروعاتی اسلامی دور کے سونے کے سکوں کا خزانہ ملا ہے۔
'ٹائمس آف اسرائیل' کی ایک رپورٹ کے مطابق یہ تقریباً 1100 سال پرانے سکے بتائے گئے ہیں۔ اس میں سونے کے کل ملاکر 425 سکے ہیں۔
اسرائیل کے محکمہ آثار قدیمہ لیات نادو جیو اور ایلی حداد نے ایک مشترکہ بیان میں کہا ہے کہ کھدائی میں 425 سکے ملے ہیں جو پوری طرح سونے سے بنے ہیں، ان میں سے زیادہ تر 1100 سال پہلے عباسی دور کے سکے ہیں۔
سکا پانے والے سماجی کارکنان میں سے ایک نوجوان نے بتایا کہ یہ حیرت انگیز لمحہ تھا۔ میں نے زمین میں کھدائی کی تو دیکھا کہ کچھ باریک پتے کی طرح کچھ نظر آرہا ہے۔ جب میں نے پھر سے دیکھا تو مجھے نظر آیا کہ یہ سونے کے سکے ہیں۔ اس نے کہا کہ یہ حقیقت میں حیرت انگیز اور دلچسپ نظارہ تھا۔
اسرائیل کے محکمہ آثار قدیمہ کی ڈائریکٹر نے ایک بیان میں بتایا کہ اندازہ ہوتا ہے کہ کسی شخص نے 1100 سال قبل پہلے سکوں کو زمین میں گاڑ دیا تھا، یہ سکے جہاں سے پائے گئے ہیں اس علاقے میں اس دور میں بازار ہوا کرتا تھا۔
