امریکی صدر جوبائیڈن کی جانب سے پوتن کو جنگی مجرم کہنے کی سخت مذمت کرتے ہوئے روس نے امریکی صدر کا بیان ناقابل معافی قرار دے دیا۔Russia Responds on War Criminal
رپورٹ کے مطابق امریکی صدر جوبائیڈن نے میڈیا سے گفتگو میں کہا کہ روسی صدر یوکرین پر حملے کے ذمہ دار ہیں، یوکرین میں ہونے والی تباہی پر میں انہیں جنگی مجرم سمجھتا ہوں۔
وائٹ ہاوس کے ترجمان جین ساکی نے جوبائیڈن کے بیان پر تبصرہ کرتے ہوئے اسے ان کے دل کی آواز قرار دیا، جین ساکی کے مطابق یوکرین میں تباہی دیکھنے کے بعد یہ امریکی صدر کا ذاتی ردعمل تھا۔
روس کی جانب سے امریکی صدر کے بیان کی سخت مذمت کی گئی ہے اور بیان کو ناقابل قبول اور ناقابل معافی قرار دیا گیا ہے۔
یہ بھی پڑھیں:
Russia Ukraine War: امریکی سینیٹ نے متفقہ طور پر پوتن کو جنگی مجرم قرار دے دیا
روسی صدر کے ترجمان دیمتری پیسکووف کا کہنا تھا کہ کسی بھی سربراہ مملکت کی جانب سے ایسا بیان کسی طور قبول نہیں۔
صدر پوتن کے ترجمان نے امریکہ کو یاددہانی کراتے ہوئے مزید کہا کہ دنیا کے مختلف ممالک میں امریکی حملوں کے نتیجے میں ہزاروں افراد ہلاک ہو چکے ہیں۔
قابل ذکر ہے کہ امریکی سینیٹ نے منگل کو روسی صدر ولادیمیر پوتن کو جنگی مجرم قرار دینے کی قرار داد متفقہ طور پر منظور کی تھی۔ Russia Ukraine War
ڈیموکریٹک سینیٹ کے رہنما چک شومر نے خطاب میں کہا، ’’ہم، ڈیموکریٹس اور ریپبلکن متحد ہوکر کہتے ہیں کہ پوتن یوکرینی عوام کے خلاف ڈھائے جانے والے مظالم کے احتساب سے نہیں بچ سکتے‘‘۔
