بادشاہت کا دور قریب قریب ختم ہوگیا ہے، علامتی بادشاہت جاری ہے لیکن شاہی محلات کی چپقلش جاری ہے اور ملکہ الزبتھ کے بڑے صاحبزادے شہزادہ چارلس نے اپنے ایک بیان میں مبینہ طور پر اعلان کیا ہے کہ وہ اپنے پوتے آرچی کو کبھی شہزادہ نہیں بننے دیں گے۔
غیر ملکی خبر رساں ادارے ڈیلی میل میں شائع ہونے والی ایک خبر کے مطابق شاہی تخت کے اگلے وارث نے کہا ہے کہ ان کے بادشاہ بننے کے بعد میگن مارکل، شہزادہ ہیری اور ان کے دو سالہ بیٹے کو شاہی خاندان کے کلیدی افراد میں شامل نہیں کیا جائے گا۔
یہ بھی پڑھیں: شہزادہ فلپ کی وفات پر عالمی رہنماؤں کا اظہارِ تعزیت
اپنے فیصلے کی وجہ بتاتے ہوئے انہوں نے کہا کہ وہ شاہی خاندان کی تعداد کم کرنے کا منصوبہ رکھتے ہیں۔ انہوں نے کہا کہ اس بات کو یقینی بنایا جائے گا کہ آرچی کبھی شہزادے کا لقب نہ حاصل کر سکیں۔
ڈیوک اور ڈچز آف سسیکس کے قریبی ذرائع سے منسوب خبر میں ڈیلی میل کا کہنا تھا کہ شہزادے چارلس نے جوڑے کو بتا دیا ہے کہ وہ بادشاہ بننے کے بعد اہم قانونی دستاویزات میں ترمیم کریں گے۔
(یو این آئی)
