چین میں امریکی سفیر ٹیری برانسٹڈ اگلے ماہ کے اوائل میں اپنا عہدہ چھوڑ دیں گے۔ جس کے بعد دونوں ممالک کے درمیان تجارتی سرگرمیوں میں نئی تبدیلیاں آسکتی ہیں۔
امریکی سفارتخانے نے ایک بیان میں کہا ہے کہ چین میں امریکی سفیر ٹیری برانسٹڈ نے گذشتہ ہفتے ٹرمپ کے ساتھ فون پر اس بات کی تصدیق کی ہے۔ جنھیں صدر ڈونلڈ ٹرمپ نے سنہ 2017 میں سفیر مقرر کیا تھا۔
تجزیہ نگاروں کا کہنا ہے کہ دنیا کی دو بڑی معیشتوں کے مابین تلخ تعلقات کے بڑھتے ہوئے تین سالہ دور اقتدار کا یہ اختتام ہوگا۔
اس اعلان سے قبل امریکی وزیر خارجہ مائیک پومپیو نے ٹویٹر پر برانسٹڈ کی خدمات کا اعتراف کرتے ہوئے ان کا شکریہ ادا کیا۔
مائیک پومپیو نے کہا کہ 'میں جمہوریہ چین میں امریکی سفیر کی حیثیت سے امریکی عوام کے لئے تین برس سے زیادہ خدمات کے لئے سفیر ٹیری برانسٹڈ کا شکریہ ادا کرتا ہوں'۔
پومپیو نے ٹویٹ کیا کہ 'سفیر ٹیری برانسٹڈ نے امریکہ اور چین کے درمیان تعلقات کو متوازن کرنے میں مدد کی ہے تاکہ دونوں ممالک کے درمیان نتیجہ خیز، باہمی اور منصفانہ تعلقات برقرار رہیں'۔
انھوں نے مزید کہا ہے کہ ' برانسٹڈ کی خدمات کے ذریعے آنے والے عشروں میں ایشیاء پیسیفک میں امریکی خارجہ پالیسی پر دیرپا اور مثبت اثرات مرتب ہوں گے'۔
چین کی وزارت خارجہ نے سفارتخانے کے اعلان سے قبل کہا کہ وہ پومپیو کے ٹویٹ سے واقف ہیں لیکن انہیں اس بارے میں کوئی اطلاع موصول نہیں ہوئی ہے کہ برانسٹڈ اپنا عہدہ چھوڑ رہے ہیں۔
