پاکستانی میڈیا کے مطابق پاکستان کے سابق وزیراعظم شاہد خاقان عباسی کی کورونا رپورٹ مثبت آئی ہے۔ جیو نیوز کی خبر کے مطابق خاقان عباسی کے اہل خانہ نے ان کے کورونا متاثر ہونے کی تصدیق کی ہے۔
ذرائع کے مطابق رپورٹ مثبت آنے کے بعد انہوں نے اپنی رہائش گاہ پر ہی خود کو قرنطینہ میں کر لیا ہے۔
اس موقع پر پاکستان مسلم لیگ (ن) کے صدر شہباز شریف نے سابق وزیر اعظم کے کورونا سے متاثر ہونے پر افسوس کا اظہار کیا ہے۔
اس کے علاوہ پاکستانی ریلوے کے وزیر شیخ رشید کا کورونا ٹیسٹ بھی مثبت آیا ہے، حالانکہ انہیں بظاہر کورونا کی کوئی علامات نہیں ہیں۔
وزارت ریلوے نے اس خبر کی تصدیق کرتے ہوئے بتایا کہ شیخ رشید ڈاکٹرز کی ہدایت کے مطابق دو ہفتے سیلف قرنطینہ میں رہیں گے۔ اس بات کی بھی اطلاع ہے کہ جو لوگ شیخ رشید کے رابطے میں آئے ہیں ان کا بھی ٹیسٹ کرایا جائے گا۔
واضح رہے کہ پاکستان میں کورونا کے کیسز میں تیزی سے اضافہ ہورہا ہے اور اب تک قومی و صوبائی اسمبلیوں کے کئی ارکان وائرس میں مبتلا ہوچکے ہیں جب کہ کچھ لوگوں کا وائرس کے سبب انتقال بھی ہو گیا۔
