فلپائن میں فائرنگ، دو پولیس اہلکار ہلاک، چار زخمی

فلپائن میں پولیس اور انسداد منشیات ایجنٹوں کے درمیان فائرنگ سے دو پولیس اہلکار ہلاک اور چار زخمی ہوئے ہیں۔

فلپائن کے دارالحکومت منیلا میں پولیس اور فلپائن کے ڈرگ انفورسمنٹ ایجنسی کے ایجنٹوں کے مابین فائرنگ کے تبادلے میں کم از کم دو پولیس اہلکار ہلاک اور متعدد زخمی ہوئے ہیں۔

پولیس نے بتایا کہ دارالحکومت منیلا میں ایک مال کے باہر پولیس اور فلپائنی ڈرگ انفورسمنٹ ایجنسی (PDEA) کے ایجنٹوں کے مابین فائرنگ کے تبادلے کے دوران دو پولیس اہلکار ہلاک اور چار زخمی ہوگئے ہیں۔

میڈیا کے مطابق، نیشنل کیپیٹل ریجن پولیس آفس کے چیف پولیس میجر جنرل وینسٹے ڈاناؤ نے بتایا کہ 'زخمیوں میں ایک پولیس افسر اور پی ڈی ای اے کے تین ایجنٹ شامل ہیں'۔

پی ڈی ای اے کے ترجمان ڈیرک کیریون نے ایک ٹیلی ویژن انٹرویو کے دوران بتایا کہ 'منشیات کے ایجنٹ کوئزن سٹی مال میں آپریشن کر رہے تھے جب فائرنگ کا تبادلہ ہوا'۔

مال انتظامیہ نے تصدیق کی ہے کہ 'فائرنگ کا تبادلہ شام 6 بجے ہوا ہے لیکن تمام خریدار اندر محفوظ ہیں'۔

پولیس نے بتایا کہ 'فائرنگ کے تبادلے کے بعد فلپائنی نیشنل پولیس (پی این پی) اور پی ڈی ای اے کے اہلکاروں پر مشتمل ایک مشترکہ بورڈ انکوائری قائم کیا جائے گا'۔

پی این پی نے ایک بیان میں کہا کہ 'اس واقعے کے بارے میں سچائی جاننے کے لیے مشترکہ پی این پی-پی ڈی ای اے بورڈ آف انکوائری تشکیل دی جائے گی جس سے یہ معلوم کیا جائے گا کہ اصل میں کیا ہوا تھا اور کس کو ذمہ دار ٹھہرایا جانا چاہئے'۔