ترکی کے صدر طیب رجب اردغان نے بین الاقوامی برادری کو چیلنچ کرتے ہوئے کہا کہ عالمی سطح پر ترکی کی مخالفت ہو یا حمایت، ہر طرح کے حالات میں ترکی اپنی فوجی کارروائی جاری رکھے گا۔
اردغان نے شامی حکومت اور کرد فورسز کے درمیان ہونے والے معاہدے کی مذمت کی ہے۔
ترکی نے واضح کر دیا ہے کہ وہ عالمی سطح پر مخالفت کی پروا کیے بغیر شدت پسند تنظیم 'داعش' سمیت دنیا بھر کے دہشت گرد جماعتوں کے خلاف جنگ جاری رکھیں گے۔
شام میں روسی مندوب لورنیٹینوف نے شام میں ترکی کی کارروائی کو نا قابل قبول قرار دیا ہے۔ انہوں نے بتایا کہ شامی حکومت اور کرد عسکریت پسندوں کے درمیان معاہدے میں روس نے ثالثی کردار ادا کیا ہے۔
اسی معاہدے کے سبب حکومتی فورسز کو کردوں کے قبضے والے علاقوں میں داخلے کی اجازت دی گئی ہے۔
اس سے قبل امریکی وزارت دفاع کی جانب سے بھی ترکی کی فوجی کارروائی کی مذمت کی گئی ہے۔ وزارت کا کہنا ہے کہ کردوں کے خلاف کارروائی کے دوران 'داعش' کے قیدیوں کی رہائی ہوئی ہے۔
اس سلسلے میں 'نیٹو' سے مطالبہ کیا گیا ہے کہ 'داعش' کے خلاف جاری مشن کو نقصان پہنچانے کے سبب ترکی کے خلاف کارروائی کی جائے۔
