ایکسپریس ٹربیون نے طالبان ذرائع کے حوالے سے اپنی ایک رپورٹ میں بتایا کہ ان بھارتی انجینئروں کو افغانستان میں ایک سال سے زائد عرصے سے یرغمال بنا کر رکھا گیا تھا۔ اتوار کو ایک نامعلوم مقام پر طالبان نے اپنے ارکان کے عوض انہیں آزاد کیا۔
ذرائع نے بتایا کہ طالبان نے اپنے جن اراکین کو رہا کرایا ہے ان میں شیخ عبدالرحیم اور مولوی عبد الرشید شامل ہیں۔ دونوں سنہ 2001 سے قبل افغانستان میں طالبان حکومت کے دوران کنٹر اور نیم روز صوبوں میں طالبان کے گورنر رہے تھے۔
طالبان ذرائع نے ایک تصویر اور فوٹیج بھی دستیاب کرایا ہے جس سے پتہ چل رہا ہے کہ جنگجوؤں کی رہائی کے بعد ان کا استقبال کیا گیا۔
افغانستان اور بھارت نے اب تک اس رپورٹ پر کوئی تبصرہ نہیں کیا ہے۔
واضح ر ہے کہ مئی 2018 میں افغانستان کے صوبہ بغلان میں ایک پاور پلانٹ میں کام کر رہے سات بھارتی انجینیئروں کو اغوا کر لیا گیا تھا ۔ کسی بھی دہشت گرد تنظیم نے ان کے اغوا کی ذمہ داری قبول نہیں کی تھی۔
