عالمی میڈیا سے ملنے والی خبروں کے مطابق افغانستان کے وزیر خارجہ مولوی امیر خان متقی نے اقوام متحدہ کے سکریٹری جنرل انٹونیو گوٹریس کوخط لکھتے ہوئے اقوام متحدہ کی جنرل اسمبلی سے خطاب کرنے کا مطالبہ کیا اور ترجمان سہیل شاہین کو افغانستان کا سفیر نامزد کیا۔
رپورٹ کے مطابق طالبان کے وزیر خارجہ امیر خان متقی نے پیر کو اقوام متحدہ کے سکریٹری جنرل کو لکھے گئے خط میں خطاب کرنے کی درخواست کی۔
عرب میڈیا کے مطابق اقوام متحدہ کے سکریٹری جنرل انٹونیوگوٹریس کے ترجمان نے طالبان وزیرخارجہ کے خط کی تصدیق کردی ہے۔
ترجمان کے مطابق افغانستان کی اقوام متحدہ کی نشست کے لئے درخواست 9 رکنی کمیٹی کو بھیجی گئی ہے، اس کمیٹی میں امریکہ، چین اور روس اور دیگر ممالک شامل ہیں۔
ترجمان کا کہنا ہے کہ کمیٹی کا پیر سے پہلے اس معاملے پرمیٹنگ کا امکان نہیں ہے۔ اس لیے شبہ ہے کہ طالبان کے وزیر خارجہ مولوی امیر خان متقی اقوام متحدہ سے خطاب نہ کر سکیں۔
یہ بھی پڑھیں: چین، روس اور پاکستان کے ایلچیوں کی طالبان کے اعلیٰ رہنماؤں سے ملاقات
واضح رہے کہ اقوام متحدہ کی جنرل اسمبلی کا سالانہ اجلاس پیر27 ستمبر کو ختم ہوجائے گا۔
میڈیا کے مطابق اقوام متحدہ کی طرف سے طالبان کے سفیر کو قبول کرنا ایک اہم قدم ہوگا۔
(یو این آئی)
