سری لنکا کی بحریہ نے منگل کو بھارتی ماہی گیروں پر حملہ کرکے کئی کشتیوں کا بین الاقوامی سمندری سرحد (آئی ایم بی ایل) تک تعاقب بھی کیا۔
سمندر کے درمیان میں ہوئے غیر انسانی حملے کا سامنا کرکے رامیشو رم واپس آئے ماہی گیروں نے نامہ نگاروں سے کہا کہ 'سری لنکائی بحریہ کے گشتی جہاز نے ہماری کشتیوں کو گھیر لیا اور پتھراو اور سوڈا بوتلیں پھینکنے لگی'۔
اس حملے میں ماہی گیر 42 سالہ سریش زخمی ہو گئے، جنہیں کنارے پر پہنچنے کے بعد سرکاری اسپتال میں داخل کرایا گیا ہے۔
سری لنکا کی بحریہ نے سمندر میں مچھلی پکڑنے والے بڑے جالوں کو بھی تباہ کردیا۔ اس دوران ماہی گیروں کو مچھلی پکڑنے کے آلات اور جی پی ایس آلا ت کا کئی لاکھ روپے کا نقصان ہوا۔
فشریز افسران نے کہا کہ تقریباً 3ہزار ماہی گیر مچھلی پکڑنے کے لئے پیر کی صبح رامیشورم سے سمندر میں داخل ہوئے تھے۔
اس درمیان پٹلی مکل کاچی (پی ایم کے) کے بانی ڈاکٹر ایس رام داس نے بھارتی ماہی گیروں پر حملے کی سخت مذمت کی اور مرکز سے ماہی گیروں کے مفادا ت کی حفاظت کرنے کے لئے ٹھوس اقداما ت کرنے کی درخواست کی ہے۔
