پی آئی اے کا کہنا ہےکہ کراچی طیارہ حادثے سے متعلق ابتدائی رپورٹ کو محکہ تسلیم کرتا ہے اور اسے ایک رہنمائی سمجھنے کے ساتھ ہی حفاطتی معیار کو مزید بہتر بنانے کے عزم کی تصدیق کرتا ہے۔
پی آئی اے کے ترجمان نے بتایا کہ کہ ملک میں سبھی پائلٹز کے لائسنسوں کا مکمل فرانزک آڈٹ کیا گیا ہے اور پی آئی اے نے مزید 15 پائلٹوں کو گراؤنڈ کردیا ہے۔
انہوں نے مزید کہا کہ پائلٹ کے لائسنسز کی مکمل فرانزک کے عمل کو تیز کرنے کی مسلسل پیروی کی گئی ہے۔ انکوائری بورڈ کی سفارشات کے بعد قصور واروں کو نوکریوں سے برخاست کیا جائے گا اور اس عمل کے نتیجے میں کچھ پروازیں منسوخ ہوسکتی ہیں۔
ترجمان کا کہنا ہے کہ صرف وہ پائلٹ پرواز کریں گے جو اعلیٰ سروس ریکارڈ کے حامل ہوں گے۔
واضح رہےکہ 22 مئی کو لاہور سے کراچی آنے ولا قومی ائیر لائن کا طیارہ کراچی میں جناح انٹرنیشنل ائیرپورٹ کے قریب آبادی پر گر کر تباہ ہوگیا تھا، جس سے 97 افراد ہلاک جبکہ دو افراد زندہ بچ گئے تھے۔
