پاکستان کے کراچی شہر میں جماعت اسلامی سے وابستہ سینکڑوں کارکنان نے متحدہ عرب امارات اور اسرائیل کے مابین ہونے والے حالیہ سفارتی تعلقات کے خلاف زبردست احتجاج کیا۔
کارکنان اپنے ہاتھوں میں بینر اور جھنڈے اٹھا کر فلسطین کی حمایت جبکہ امریکہ اور اسرائیل کے خلاف نعرے بازی کر رہے تھے۔
جماعت اسلامی کراچی کے صدر حافظ نعیم الرحمن نے دنیا بھر سے مطالبہ کیا ہے کہ پوری دنیا کو چاہیے کہ اسرائیل کی مذمت کی جائے اور اسرائیل کے خلاف سبھی کو اقدام اٹھانا چاہیے۔
ان کا کہنا ہے کہ وہ اسرائیل کے ضم کے منصوبے کو کسی بھی صورت میں قبول نہیں کریں گے۔
مظاہرین کا یہ بھی کہنا تھا کہ وہ اسرائیل کے وجود کو اس وقت تک تسلیم نہیں کر سکتے، جب تک فلسطینیوں کی شرط پر فلسطین کا مسئلہ حل نہ ہو جائے۔
خیال رہے کہ پاکستان اسرائیل کو ایک ملک کے طور پر تسلیم نہیں کرتا ہے۔ یہی وجہ ہے کہ پاکستان نے جمعہ کے روز متحدہ عرب امارات-اسرائیل کے اس اعلان پر محتاط ردعمل پیش کیا ہے۔
