پاکستان کے دارالحکومت اسلام آباد میں بنی گالہ کی پولیس نے گذشتہ گئی دنوں سے سرخیوں میں رہنے والی امریکی شہری سنتھیا رچی کے خلاف مقدمہ درج کرنے سے انکار کر دیا ہے۔
پولیس کا کہنا ہے کہ اگر سنتھیا رچی کے خلاف کارروائی مقصود ہے تو ایف آئی اے سائبر کرائم برانچ سے رجوع کیا جائے۔
خیال رہے کہ گذشتہ دنوں پاکستانی سیاست دانوں میں اس وقت ہنگامہ مچ گیا، جب امریکی شہری سنتھیا رچی نامی خاتون نے کہا تھا کہ سنہ 2011 میں پاکستان کے سابق وزیر داخلہ رحمن ملک نے ان کے ساتھ زنا بالجبر کیا تھا، جبکہ سابق وزیراعظم یوسف رضا گیلانی اور مخدوم شہاب الدین نے دست درازی کی تھی۔
اس کے علاوہ انہوں نے پاکستان پیپلز پارٹی کی رہنما اور ملک کی سابقہ وزیر اعظم بےنظر بھٹو پر بھی سنگین الزام عائد کیا تھا۔ انہوں نے کہا تھا کہ بے نظیر بھٹو اپنے شوہر آصف زرداری کی آشنا خواتین کے ساتھ اپنے گارڈ کے ذریعہ جنسی زیادتی کرواتی تھیں۔
حالانکہ پیپلز پارٹی کی اعلیٰ قیادت نے سنتھیا رچی کے الزامات کی سختی سے تردید کی ہے اور پارٹی نے سنتھیا کے خلاف عدالت سے بھی رجوع کیا ہے۔
اس کے علاوہ پاکستانی میڈیا کے مطابق رحمن ملک نے سنتھیا رچی کو 50 ارب روپے ہرجانے کا نوٹس بھیجا ہے جب کہ سنتھیا رچی نے یوسف رضا گیلانی کو 12 کروڑ روپے ہرجانے کا نوٹس بھجوایا ہے۔
