پاکستان کے قومی اسمبلی کے اسپیکر اسد قیصر نے بدھ کے روز حکمران جماعت پاکستان تحریک انصاف کے تین رکن سمیت سات اراکین اسمبلی کو ایوان میں داخل ہونے سے روک دیا ہے۔ پارلیمنٹیرین اور حذب اختلاف کے رہنماوں نے بدسلوکی کی اور ایک دوسرے پر بجٹ کی کاپیاں پھینکی۔ جس کے بعد اسپیکر نے سات اراکین اسمبلی پر پابندی عائد کی ہے۔
اسپیکر اسد قیصر نے کہا 'قومی اسمبلی میں حزب اختلاف کے رہنما شہباز شریف کی تقریر کے دوران اجلاس میں خلل ڈالنے والے اراکین کو ایوان میں داخل ہونے سے روک دیا گیا ہے کیونکہ ان کا برتاؤ "غیر پارلیمینٹری" اور "نامناسب" تھا۔ انہوں نے قوانین کی خلاف ورزی کی اور بار بار ہدایت کے باوجود ایوان کی کارروائی میں خلل پیدا کیا'۔
پی ٹی آئی اور مسلم لیگ (ن) سے تعلق رکھنے والے چھ قانون سازوں اور پاکستان پیپلز پارٹی کے ایک ممبر کو اجلاس میں شرکت سے روک دیا گیا ہے۔ ان اراکین میں علی گوہر خان (مسلم لیگ ن)، چودھری حامد حمید (مسلم لیگ ن)، شیخ روحیل اصغر (مسلم لیگ ن)، فہیم خان (پی ٹی آئی)، عبد المجید خان (پی ٹی آئی)، علی نواز اعوان (پی ٹی آئی) اور سید آغا رفیع اللہ (پی پی پی) شامل ہیں۔
اسپیکر نے کہا کہ ان سبھی اراکین کو اگلے احکامات تک پارلیمنٹ ہاؤس کی حدود میں داخلہ کی اجازت نہیں ہوگی۔
