پاکستان کے وزیراعظم عمران خان اور اہم اپوزیشن جماعتوں کے رہنماؤں نے جمعرات کو ملک کی اقلیتی ہندو برادری کو روشنیوں کے تہوار دیوالی کے موقع پر مبارکباد دی۔
عمران خان نے اردو اور انگریزی دونوں زبانوں میں ٹویٹ کیا، "اپنی پوری ہندو کمیونٹی کو دیوالی کی مبارکباد پیش کرتا ہوں۔"
دیوالی دنیا بھر میں ہندوؤں کے ذریعہ منائے جانے والے بڑے تہواروں میں سے ایک ہے۔ 40 لاکھ سے زائد پاکستانی ہندو بھی اس تہوار کو مذہبی عقیدت کے ساتھ مناتے ہیں۔
پاکستان کے وزیر اطلاعات فواد چوہدری، وزیر منصوبہ بندی و ترقی اسد عمر اور انسانی حقوق کی وزیر شیریں مزاری نے بھی ہندو برادری کو دیوالی کی مبارکباد دی۔
پاکستانی قومی اسمبلی میں قائد حزب اختلاف اور پاکستان مسلم لیگ نواز کے صدر شہباز شریف نے بھی اس موقع پر پاکستان اور دنیا بھر میں مقیم ہندو برادری کو نیک خواہشات کا اظہار کیا۔ انھوں نے ٹویٹ کیا "روشنیوں کا تہوار پوری دنیا میں امن، محبت اور خوشی کا ذریعہ ہو!"۔
پاکستان پیپلز پارٹی کے چیئرمین بلاول بھٹو نے بھی ہندو برادری کو دیوالی کی مبارکباد دی۔ انہوں نے کہا، 'ہمیں دیوالی کے پیغام کو سمجھنے کی ضرورت ہے۔ یہ ہمیں سکھاتا ہے کہ برائی خواہ کتنی ہی طاقتور کیوں نہ ہو، مسلسل جدوجہد اور عزم مصمم کے ذریعے اس کی شکست ناگزیر ہے۔
پی پی پی چیئرمین نے کہا کہ ان کی پارٹی کا فلسفہ بھی ’’ملک میں اندھیروں، ناانصافیوں اور عدم مساوات کے خلاف لڑنا ہے۔
ہندو پاکستان میں سب سے بڑی اقلیتی برادری ہیں۔ پاکستان کی ہندو آبادی کی اکثریت صوبہ سندھ میں آباد ہے جہاں وہ اپنے مسلمان ساتھیوں کے ساتھ ثقافت، روایات اور زبان کا اشتراک کرتے ہیں۔
