پاکستان کے قومی سلامتی کے مشیر (این ایس اے) معید یوسف نے بھارت کی جانب سے غلطی سے پاکستان میں میزائل گرنے پر افسوس کا اظہار کرنے کے بعد حساس ٹیکنالوجی کو سنبھالنے کی نئی دہلی کی صلاحیت پر سوال اٹھایا ہے۔Pak NSA on Violation of Pak Airspace
اور انھوں نے دنیا پر زور دیا کہ وہ اس بات پر غور کرے کہ کیا پڑوسی ملک حفاظت اور سلامتی کو یقینی بنانے کی صلاحیت رکھتا ہے۔
سلسلہ وار ٹویٹ میں، معید یوسف نے نشاندہی کی کہ دہلی کو یہ تسلیم کرنے میں دو دن سے زیادہ کا وقت لگا کہ 'یہ ان کا میزائل تھا جو مینٹیننس کے دوران تکنیکی خرابی کی وجہ سے حادثاتی طور پر فائر ہوگیا تھا'۔
انہوں نے کہا کہ "یہ اس طرح کی حساس ٹیکنالوجی کو سنبھالنے کی بھارت کی صلاحیت کے بارے میں سنجیدہ سوالات اٹھاتا ہے۔ یہ میزائل بین الاقوامی اور ملکی فضائی کمپنیوں کے راستے کے قریب تھا جو شہریوں کی حفاظت کے لیے خطرہ تھا۔
انہوں نے کہا کہ "جوہری دنیا میں، اس طرح کی لاپرواہی اور نااہلی بھارتی ہتھیاروں کے نظام کی حفاظت پر سوال اٹھاتی ہے۔"
انہوں نے کہا کہ بھارت میں یورینیم کی چوری کے کئی واقعات پہلے ہی رپورٹ ہو چکے ہیں اور حالیہ دنوں میں اس کے شہریوں کو ’یورینیم کی سمگلنگ‘ کے الزام میں گرفتار کیا گیا ہے۔
معید یوسف نے کہا کہ پاکستان نے متعدد دفعہ دنیا پر زور دیا کہ وہ 'بھارت کے غیر ذمہ دارانہ رویے' پر توجہ دے، جسے نظر انداز کر دیا گیا۔ دہلی کے اس غیر ذمہ دارانہ رویے سے علاقائی استحکام کو خطرہ لاحق ہے۔
این ایس اے معید یوسف نے کہا، ’’ 9 مارچ کو پیش آنے والا حالیہ واقعہ اور اس کے بعد ہونے والے واقعات کو دیکھتے ہوئے، دنیا کو غور کرنا چاہیے کہ کیا بھارت اپنے جوہری اور دیگر جدید ترین ہتھیاروں کے نظام کی حفاظت کو یقینی بنانے کے قابل ہے‘‘۔
معید یوسف نے 9 مارچ کے واقعے کے 'حقیقی حالات' کی تحقیقات کا بھی مطالبہ کیا، "یہ معلوم کرنے کے لیے کہ آیا یہ ایک غیر ارادی لانچ تھا یا جان بوجھ کر کیا گیا، کیونکہ بھارتی حکومت کے کسی بھی بات یقین کرنا مشکل ہے۔
یہ بھی پڑھیں:
Violation of Pak Airspace: غلطی سے میزائل فائر ہوا، بھارت کا اظہار افسوس
Violation of Pak Airspace: پاک فضائی حدود کی خلاف ورزی پر بھارت سے وضاحت طلب کی
واضح رہے کہ ڈی جی آئی ایس پی آر نے جمعرات کو پریس بریفنگ کے دوران کہا تھا کہ 'پاکستان اس فضائی حدود کی صریح خلاف ورزی کی سختی سے مخالفت کرتا ہے اور مستقبل میں ایسے کسی بھی واقعے کے دوبارہ ہونے کے خلاف خبردار کرتا ہے'۔
اسلام آباد میں دفتر خارجہ (ایف او) نے اپنی فضائی حدود کی بلا اشتعال خلاف ورزی پر پاکستان کا احتجاج درج کرانے کے لیے ہندوستانی سفیر کو طلب کرتے ہوئے کہا تھا کہ اس طرح کے "غیر ذمہ دارانہ واقعات" پڑوسی ملک کی "فضائی سلامتی" کو نقصان پہنچا سکتے ہیں اور علاقائی امن و استحکام سے لاتعلقی کا باعث بن سکتے ہیں۔
اس نے واقعے کی مکمل اور شفاف انکوائری کا بھی مطالبہ کیا تھا، جس کے نتائج پاکستان کے ساتھ شیئر کیے جائیں۔
دریں اثناء وزیر خارجہ شاہ محمود قریشی نے واقعے پر تشویش کا اظہار کرتے ہوئے کہا ہے کہ عالمی برادری اور ہوا بازی کی تنظیموں کو اس کا نوٹس لینا چاہیے۔
