احتساب عدالت نے سابق وزیراعظم نواز شریف کے خلاف غیر ضمانتی وارنٹ جاری کرتے ہوئے دفترِ خارجہ کو برطانیہ میں پاکستانی سفارت خانے کے ذریعے وارنٹس کی تعمیل کا حکم بھی دیا۔ جبکہ سابق صدر آصف علی زرداری کی آج حاضری سے استثنیٰ کی درخواست منظور کر لی۔
واضح رہے کہ عدالت نے سرکاری توشہ خانہ سے تحفے میں ملنے والی گاڑیوں کی غیر قانونی طریقے سے خریداری کے کیس میں سابق وزیراعظم نواز شریف کے غیر ضمانتی گرفتاری کے وارنٹ جاری کر دیے ہیں۔
نواز شریف، آصف زرداری اور یوسف رضا گیلانی پر الزام ہے کہ ان شخصیات نے دیگر ممالک کے سربراہان و امرأ سے تحفے میں ملی گاڑیوں کو معمولی رقم ادا کرنے کے بعد توشہ خانہ سے اپنے ہمراہ لے گئے تھے۔
سماعت کے دوران سابق وزیرِ اعظم اور پیپلز پارٹی رہنما یوسف رضا گیلانی پیش ہوئے۔ عدالت نے آصف علی زرداری کو بلاول ہاؤس کراچی کے پتے پر دوبارہ طلبی کے نوٹس جاری کر دیے جبکہ یوسف رضا گیلانی کی مستقل حاضری سے استثنیٰ کی درخواست پر نیب کو نوٹس جاری کر دیا۔
