عالمی سطح پر کورونا وائرس سے متاثرین اور ہلاکتوں کی تعداد میں مسلسل اضافہ ہو رہا ہے۔ تا دم تحریر عالمی سطح پر کورونا متاثرین کی تعداد 48 لاکھ 4 ہزار 846 تک پہنچ چکی ہے۔ متاثرین میں سے 3 لاکھ 16 ہزار 711 افراد ہلاک ہوئے ہیں، جبکہ 18 لاکھ 58 ہزار 173 افراد مکمل طور پر صحتیاب ہوئے ہیں۔
چین میں پیر کو کورونا وائرس کے سات نئے معاملات کی تصدیق ہوئی ہے۔ البتہ یہاں ایک ماہ سے زائد کے بعد ایک بھی موت کی تصدیق ہوئی ہے۔
بھارت میں متاثرین کی مجموعی تعداد 96 ہزار 169 ہو چکی ہے۔ 3 ہزار 29 افراد ہلاک ہوئے ہیں۔
بھارت میں سب سے زیادہ 33 ہزار 53 کیسز کے ساتھ مہاراشٹر پہلے نمبر پر ہے۔ یہاں اب تک 1 ہزار 198 افراد ہلاک ہو چکے ہیں۔ دوسرے نمبر پر گجرات اور تیسرے نمبر پر تمل ناڈو ہے۔ اس کے علاوہ سکم بھارت کی واحد ایسی ریاست ہے جہاں اب تک ایک بھی کیس کی تصدیق نہیں ہوئی ہے۔
فی الحال دنیا بھر میں کورونا کے سب سے زیادہ مریض امریکہ میں ہیں۔ یہاں متاثرین کی تعداد 15 لاکھ 27 ہزار 664 ہو چکی ہے۔ ان میں سے 90 ہزار 978 افراد ہلاک ہوئے ہیں۔
واضح رہے کہ اس نئے کورونا وائرس کے سبب مریض کو بخار، کھانسی جیسی معمولی علامتیں ظاہر ہوتی ہیں، تاہم بڑی عمر اور بیمار افراد کے لیے ہلاکت کا شدید خطرہ ہے۔
