اس برس یوم جمہوریہ پریڈ کے مہمان خصوصی برازیل کے صدر جیئر میریوس بولسونارو ہوں گے اور صدر کی مدت کار میں یہ ان کا ہندستان کا پہلا دورہ ہوگا۔
دہلی علاقہ کے چیف آف اسٹاف (سی او ایس) اور پریڈ کے ڈپٹی کمانڈر میجر جنرل اشوک ککڑ نے جمعرات کو یوم جمہوریہ۔2020میڈیا پریویو میں نامہ نگاروں کو بتایا کہ یوم جمہوریہ کی پریڈ میں فوجی دستہ کی قیادت آرمی سگنل کور کی افسر کیپٹن تانیہ شیرگل سنبھالیں گی۔
پریڈ میں ٹرانسپورٹیبل سیٹلائٹ ٹرمنل وہیکل کی کمان میجرشینا نائر کے ہاتھوں میں ہوگی۔
اس بار پہلی بار فوج کا فضائی دفاعی دستہ، اتولیہ راڈار، پیراشوٹ دستہ، دھنش 45کیلیبر آرٹلری گن، کے۔9، وزر ٹی اور فوجی دستہ کی کمان کیمپٹن تانیہ شیرگل اور سگنل کور ٹرانسپورٹیبل ٹرمنل (ٹی ایس ٹی) وہیکل کی کمان 21 سگنل گروپ کی میجر شینا نائر پریڈ کی اہم کشش ہوں گے۔
اس بار پریڈ میں مجموعی طورپر 16مارچنگ دستے ہوں گے اور ان میں فوج، فضائیہ، بحریہ، نیم فوجی دستوں کے علاوہ دہلی پولیس اور این سی سی کے دستے بھی حصہ لیں گے۔
اس میں 22ریاستوں کی جھانکیاں بھی شامل کی جائیں گی اور قومی انعام سے نوازے گئے 44بچے بھی شامل ہوں گے۔ اس کے علاوہ چار اسکولوں کے بچے ثقافتی پروگرام پیش کریں گے۔
پریڈ میں 21بینڈ حصہ لیں گے اور ان میں 13فوجی بینڈ کے دستے ہوں گے۔ یہ پریڈ 90منٹ کی ہوگی اور صبح دس بجے شروع ہوکر ساڑھے گیارہ بجے تک چلے گی۔
