اسرائیلی فوج نے بتایا کہ غزہ پٹی میں حماس کے ٹھکانوں کا نشانہ بنایا گیا، کیوں کہ اس سے قبل اتوار کو حماس کے عسکریت پسندوں نے فلسطینی خطے سے اسرائیل کی طرف دو راکٹ داغے تھے۔
فوج نے اپنے بیان میں کہا کہ فائٹر جیٹس، ہیلی کاپٹرز اور ٹینک سے حماس کے انڈر گراونڈ بنیادی ڈھانچے اور فوجی چوکیوں کو نشانہ بنایا گیا۔
اسرائیلی فوج نے بتایا کہ حماس کے ذریعہ اسرائیل میں دو راکٹ داغے گئے، جس میں ایک جنوبی اسرائیل کے شہر اشدود پہنچا اور دوسرا وسطی اسرائیل تک چلا گیا۔
فوج نے بتایا کہ دونوں راکٹز کھلے علاقوں میں گرے اور دونوں اطراف میں کسی کے زخمی ہونے کی کوئی اطلاع نہیں ہے۔ فوری طور پر حماس کی جانب سے کوئی تبصرہ نہیں آیا ہے۔
واضح رہے کہ سنہ 2007 سے اب تک اسرائیل اور حماس نے تین جنگیں لڑی ہیں۔ اس کے علاوہ دونوں کے درمیان متعدد جھڑپیں ہو چکی ہیں۔ غزہ میں متعدد شدت پسند تنظیمیں کام کر رہی ہیں، لیکن ہر طرح کے حملوں کے لیے حماس کو ہی ذمہ دار مانا جاتا ہے۔
