ایران کے اعلی رہنما آیت اللہ علی خامنہ ای نے کووڈ 19 کی وبا کےسلسلے میں اسلامی جمہوریہ ایران کو امریکی امداد کی پیش کش کو مکمل طو سے مسترد کردیا۔
آیت اللہ خامنہ ای نے کہا کہ امریکی عہدیداروں نے اپنی پیش کش کے بارے میں ایران کو مسلسل پیغامات بھیجتے رہے ہیں لیکن ایران نے اسے قبول نہیں کیا کیونکہ ایران کو ان پر اعتماد نہیں ہے۔
انہوں نے کہا کہ ' شک ہے کہ تم امریکیوں نے اس کورونا وائرس کو جنم دیا ہے۔ مجھے نہیں معلوم کی اس الزام میں کتنی سچائی ہے۔ اگر ایسا ہے تو آپ کی بات پر کون یقین کرے گا۔ ممکنہ طور پر آپ کی دوا وائرس کو مزید پھیلانے کا ایک طریقہ ہے۔ یہ ممکن ہے کہ آپ کوئی دوا تجویز کریں یا اسے ملک میں لائیں جس سے وائرس برقرار رہے اور اسے ختم ہونے سے روک دے۔
اعلی ایرانی رہنما نے مزید کہا کہ کورونا وائرس پھیلنے سے نمٹنے کے لئے امریکیوں کو خود اپنے ملک کے اندر دشواریوں کا سامنا کرنا پڑا رہا ہے۔
واضح رہے کہ کورونا وائرس سے سب سے زیادہ متاثرممالک میں ایران شامل بھی ہے۔ اس کی تصدیق شدہ کیسوں کی کل تعداد 20،000 سے زیادہ ہے۔
