بھارت نے بابری مسجد انہدام کیس کے تمام 32 ملزموں کو بری کیے جانے سے متعلق پاکستان کی تنقید کو سختی سے مسترد کر دیا۔
پاکستان کے دفتر خارجہ نے بدھ کے روز اس کیس میں ملزموں کو بری کیے جانے کی مذمت کرتے ہوئے بھارتی حکومت سے اقلیتوں خصوصا مسلمانوں اور ان کی عبادت گاہوں کے تحفظ کو یقینی بنانے کی تاکید کی تھی۔
وزارت خارجہ کے ترجمان انوراگ سریواستو نے آن لائن میڈیا بریفنگ میں کہا کہ بھارت ایک پختہ جمہوری ملک ہے، جہاں حکومت اور لوگ، عدالت کے فیصلوں کی پاسداری کرتے ہیں اور قانون کی حکمرانی کا احترام کرتے ہیں۔
واضح رہے کہ بدھ کے روز لکھنؤ میں سی بی آئی کی خصوصی عدالت نے بی جے پی کے سینئر رہنما ایل کے اڈوانی اور مرلی منوہر جوشی سمیت 32 لوگوں کو یہ کہتے ہوئے بری کر دیا تھا کہ ان کے خلاف بابری مسجد کے انہدام سے متعلق کوئی حتمی ثبوت نہیں ہے۔
