چین میں کورونا کے لوٹنے کا خدشہ

چین کے ووہان صوبہ سے پھیلے کورونا وائرس کی وبا سے راحت کے بعد ملک میں پٹری پر لوٹ رہی زندگی پر پھر سے اس انفیکشن کا خطرہ بڑھ گیا ہے۔

ذرائع کے مطابق دارالحکومت بیجنگ میں کورونا پازیٹیو معاملوں کی تصدیق کے بعد انتظامیہ میں افراتفری مچ گئی ہے اور جنوبی بیجنگ کے گیارہ رہائشی علاقوں میں لاک ڈاؤن لگادیا گیا ہے۔

بیجنگ کے فینتائی ضلع میں سنیچر کو صبح کورونا وائرس کے پانچ نئے معاملے سامنے آنے کے بعد یہاں ’بحرانی دور‘ کا اعلان کردیا گیا ہے۔

فینتائی کے شفانڈی میٹ بازار میں کئی کورونا پازیٹو معاملے سامنے آئے ہیں۔ بازار سے لیے گئے 517 نمونوں میں سے 45 میں کورونا کی تصدیق ہوئی ہے۔

میڈیا رپورٹوں میں افسران کے حوالے سے کہا گیا ہے کہ انفیکشن کے معاملے چھ بڑے تھوک بازاروں اور سی فوڈ بازاروں میں ملے ہیں۔ ان بازاروں سے جڑے سبھی لوگوں کی نیوکلک ایسڈ جانچ کرائی جارہی ہے۔

افسران کا کہنا ہے کہ صرف شیفانڈی بازار کے دس ہزار سے زیادہ لوگوں کی جانچ کروائی جائے گی۔ اردگرد کے کئی اسکولوں کو بھی بند کردیا گیا ہے۔