میڈیا میں شائع ایک رپورٹ کے مطابق ابراہیم رئیسی ایک کروڑ 78 لاکھ ووٹ لے کر فاتح قرار پائے جبکہ اُن کے مقابل امیدوار محسن رضائی 33 لاکھ اور عبد الناصر ہمتی 24 لاکھ ووٹ لے کر تیسرے نمبر پر رہے۔ ابرہیم رئیسی نے 62 فیصد، محسن رضائی گیارہ اور عبدالناصر ہمتی 8 فیصد ووٹ حاصل کرسکے۔
مزید پڑھیں :ابراہیم رئیسی ایران کے صدر منتخب
پاکستان میڈیا کے مطابق وزیراعظم عمران خان نے ہفتے کو صدارتی انتخاب میں فتح حاصل کرنے والے ایران کے نو منتخب صدر کو فتح حاصل کرنے پر دل کی اتہہ گہرائیوں سے مبارک باد پیش کی۔
اپنے ٹویٹر پیغام میں وزیراعظم عمران خان نے کہا ہے کہ ’اسلامی جمہوریہ ایران کے تیرہویں صدارتی انتخابات میں تاریخی فتح حاصل کرنے پر میں عزت مآب برادر ابراہیم رئیسی کو دلی مبارکباد پیش کرتا ہوں‘۔ انہوں نے لکھا کہ ’دونوں ممالک کے مابین برادرانہ تعلقات میں مزید پختگی، علاقائی امن، ترقی اور خوشحالی کے حصول کیلئے بطور وزیراعظم ان کیساتھ مل کر کام کرنیکا خواہاں ہوں‘۔
دوسری جانب ترک صدر رجب طیب اردوان نے بھی ابراہیم رئیسی کو ایران کا 13ویں صدر منتخب ہونے پر مبارک باد پیش کی۔ اپنے تہنیتی پیغام میں اُنہوں نے کہا کہ ’نئے صدر کے انتخاب کے بعد دونوں ممالک کے درمیان تعلقات کی نئی راہیں کھلیں گی اور رشتہ مزید مضبوط ہوگا‘۔
مسٹر ایردوان نے نئے ایرانی صدر کے ساتھ کام کرنے کی خواہش کا اظہار کیا اور اپنے مکمل تعاون کی یقین دہانی کرائی۔ ترک صدر نے کرونا وبا تھمتے ہی ایران کے دورے کا اعلان بھی کیا۔
