پاک افغان سرحد پر آج افغانستان کی جانب سے شدت پسندوں کے ایک حملے میں چار پاکستانی فوجی ہلاک ہو گئے جبکہ اس دوران مزید چھ فوجی زخمی ہوگئے ہیں۔
میڈیا کے ذرائع نے پاکستانی فوج کے حوالے سے خبر دی ہے کہ پاکستانی فوج کے متاثرہ اہلکار بلوچستان کے ضلع ژوب میں افغانستان کے ساتھ منسلک سرحد پر باڑ لگانے کا کام کر رہے تھے۔ ژوب کی سرحد افغان صوبے پکتیکا سے ملتی ہے۔
پاکستان کا کہنا ہے کہ افغانستان کے ساتھ پچیس سو کلو میٹر طویل سرحد پر باڑ لگائی جارہی ہے تاکہ ممکنہ طور پر عسکریت پسندوں کی کارروائیوں کو روکا جا سکے۔ تاہم افغانستان اس عمل کی تائید نہیں کرتا۔ کابل حکومت کا کہنا ہے کہ ایسا کرنے سے کئی خاندان تقسیم ہوجائیں گے اور انہیں ایک دوسرے سے ملاقات کرنے میں مشکلات درپیش آئیں گی۔
پاک افغان سرحد پر دونوں ممالک کی سکیورٹی فورسز کے مابین کشیدگی کے واقعات پیش آتے رہتے ہیں۔ گزشتہ سال جولائی میں کم از کم بائیس افراد اس لیے ہلاک ہو گئے کیوں کہ بہت زیادہ تعداد میں لوگوں نے پاکستان سے افغانستان جانے کی کوشش کی تھی۔ اس دوران افغان اور پاکستانی فوجیوں کے درمیان فائرنگ کا تبادلہ بھی ہوا۔
(یو این آئی)
