آرمینیا میں ترکی اور آذربائیجان کے خلاف احتجاج

ناگورنو قرہباخ کے اس تنازعہ میں ترکی نے آذربائیجان کی حمایت کی بات کہی ہے۔ صدر رجب طیب اردگان نے آرمینیا پر زور دیا ہے کہ وہ اس علاقے سے فوری طور پر واپس چلے جائے۔ دوسری جانب آرمینیا میں ترکی اور آذربائیجان کے خلاف مظاہرے ہو رہے ہیں۔

آرمیینا اور آذربائیجان کے درمیان جنگ کے دوران آرمینیا کے دارالحکومت یرییوان میں مظاہرین نے ریلی نکالی اور اقوام متحدہ سے مطالبہ کیا کہ وہ متنازعہ ناگورنو قرہباخ خطے میں کشیدگی پیدا کرنے کے لیے آذربائیجان اور ترکی کی مذمت کرے۔

آرمینیائی دارالحکومت میں مظاہرین نے بینرز اور جھنڈے اٹھا رکھے تھے۔ ساتھ ہی آذربائیجان کے خلاف نعرے بازی بھی کر رہے تھے۔ مظاہرین نے مارچ کرنے کے بعد شہر میں واقع اقوام متحدہ کے دفتر کو اپنے مطالبات کا ایک خط بھی پہنچایا۔

کئی عشروں کے تنازعہ والے خطے ناگورنو قرہباخ میں باضابطہ جنگ کا تیسرا دن ہے۔ یہاں کے مقامی باشندے جو عیسائی ہیں وہ اس خطے کو آزاد کرانے کی جدوجہد کر رہے ہیں جس کے نتیجے میں مسلم اکثریتی ملک آذربائیجان اور عیسائی اکثریتی ملک آرمینیا میں جنگ چھڑ گئی ہے۔

آرمینیا اور آزربائیجان کی افواج نے ایک دوسرے کے خلاف ان کی سر زمین پر حملے کا الزام عائد کیا ہے۔

واضح رہے کہ ناگورنو قرہباخ کا علاقہ آذربائیجان کے اندر واقع ہے، لیکن سوویت یونین ٹوٹنے کے تین برس بعد سنہ 1994 سے ہی آرمینیائی فوج کی حمایت یافتہ نسلی آرمینیائی فوج کے کنٹرول میں ہے۔