چین نے ہواوئی کی چیف فنانشل آفیسر مینگ وانجھو کو کنیڈا میں حراست میں لیے جانے کی مذمت کی ہے اور اسے سنگین سیاسی واقعہ قرار دیا ہے۔
کنیڈا میں واقع چین کے سفارت خانے نے یہ تبصرہ محترمہ مینگ کی امریکہ حوالگی کا عمل ختم کرنے کی درخواست برٹش کولمبیا سپریم کورٹ کی جانب سے بدھ کو مسترد کئے جانے کے بعد کیا ہے۔
سفارت خانے کے ترجمان نے کہا کہ پورا معاملہ مکمل طور پر سنگین سیاسی واقعہ ہے۔ سفارت خانے نے امریکہ پر چین کی ہائی ٹیک کمپنیوں کو نقصان پہنچانے کی کوشش کرنے کا بھی الزام لگایا اور کہا کہ کنیڈا اس نا انصافی میں امریکہ کا ساتھ دے رہا ہے۔
کنیڈا نے اگرچہ ان الزامات سے انکار کرتے ہوئے کہا ہے کہ کناڈا کی عدالت نے آزادانہ طور پر یہ فیصلہ لیا ہے اور اس میں کسی کی مداخلت نہیں ہے۔
سفارت خانے نے کہا کہ چین محترمہ مینگ کو حراست میں لیے جانے کی سخت مذمت کرتا ہے اور کنیڈا کے حکام سے انہیں فوری رہا کرنے کی اپیل کرتا ہے۔ محترمہ مینگ کو یکم دسمبر 2018 کو وینكوور ہوائی اڈے سے گرفتار کیا گیا تھا۔
